Interneteko albistegia

Lopez lehendakari, eta Ares kultura sailburu

Luistxo Fernandez - Eibar.org ¦ 2008-10-16 ¦ 08:40 ¦ p2p

Barkatu: izenburukoa txantxa da. Ez naiz ari Ares horretaz, baizik eta software programa batez. Fitxategi handiak jaitsi eta partekatzeko, bereziki musika eta filmak Internetetik eskuratzeko, Ares edo Ares Galaxy da moda-modan dagoen p2p edo peer-to-peer programa.

Publizitatea

Gure aitaren etxean, Kolonbiako emakume batek lan egiten du gure aita nagusia zaintzen (Markos Zapiainen ideiek zer pentsatua eman beharko ligukete, bai, baina gauzak diren bezala daude): hark deskubritu du auzoan irekita dagoen wifi seinale bat, eta handik jaisten ditu gauzak. Joan den astean galdetu nion: Zerekin zabiltza? "Ares-ekin", eta erakutsi zidan. Neuk sekula entzun edo ikusi gabea.

Asteburuan, mendi-irteera ikastolako haurrekin. Igeldoko herri-eskolako 11 urteko mutiko batekin eta bere aitarekin berriketan, etxean Wimax bidez jasotzen dutela Internet, hau eta bestea... Galdetu diot mutikoari: Erabiltzen duzu Emule? "Bai zera! Oso txarto dabil! Ares da erabiltzen dudana."

Seinaleak argiak dira. Espertorik espertoenak ados daude, eta agian The Wall Street Journal-en edo CNN-n ez dira enteratu, baina Ares da modako trastoa.

Ares Windows sistema eragilean dabil, baina software librea da (GPL):

Azalpen batzuk Wikipedian
Sourceforge-n informazio gehiago, eta jaisteko aukera.
Ares zenbait hizkuntzatan dago eskuragarri, eta itzul liteke euskarara, inor animatzen bada. Hona katalanezko itzulpen-sortaren adibidea.

Protokolo eta bilaketa-sistema berezkoa darabil, baina horietan gauzarik aurkitzen ez denean ere (edo nahi duzun guztietan), Torrent formatuko fitxategietara jo dezakezu, horietara egokitua baitago Ares. Torrent bilatzaileetan (hala nola Mininova edo The Pirate Bay ezaguna) aurkitutakoak jaisteko ematen baduzu, Ares-ek kudeatuko du deskarga. Informazio apur bat hemen euskaraz BitTorrent formatuaren inguruan.

Erantzunak

#1. Re: Lopez lehendakari, eta Ares kultura sailburu

Igor ¦ 2008-10-16 ¦ 09:19

Neu 14 urteko ikasleen aurrean moderno plantak egiten hasi nintzen, Emule-ri buruz hizketan, eta haiek eman zidaten Ares-en berri. Harrezkero ez dut Emule erabili eta moderno plantak egiteari utzi diot.

#2. Re: Lopez lehendakari, eta Ares kultura sailburu

assar ¦ 2008-10-16 ¦ 10:32

Atzeratuta zabiltzate modernotasunetan, bai. BitTorrent sareak aspaldi jan zion lekua mandoaren sareari gauza "serioetarako" erabiltzeko orduan.

Adibidez, GNU/Linux banaketa gehienek BitTorrent sarea erabiltzen dute beren fitxategien deskargak arintzeko.

BitTorrent aplikazioen hirugarren uhinean iritsi zarete. Lehenengo BitTorrent aplikazioa bera izan zen; gero Azureus; eta orain Ares. Euskaraz ere badaude BitTorrent bezeroak, esaterako "µTorrent":http://www.utorrent.com. Eta Librezale taldeko jendea Azureus euskarara lokalizatzen ari da.

#3. Re: Lopez lehendakari, eta Ares kultura sailburu

ana ¦ 2008-10-16 ¦ 11:26

Vuze berria atera da. Kristorena, hi.

#4. Vuze

Sustatu ¦ 2008-10-16 ¦ 11:51

Hemen dago Vuze, BitTorrent-erako beste aplikazio bezero bat, Windows sistema eragilean dabilena.

#5. Re: Lopez lehendakari, eta Ares kultura sailburu

iñaki ¦ 2008-10-16 ¦ 12:37

Egia esan nik Ares aspalditik ezagutzen nuen. Gaur egun ez dut askorik erabiltzen, bittorrent nahiago. utorrent windows-en eta vuze/azureus linux-en. Hala ere nik esango nuke, oraindik ere, betetzen dela honakoa puntu bateraino: "emulen topatzen ez dena ez dago topatzerik". Hori bai abiadura aldetik besteen aurrean negargarria da.
Ares-en beste abantaila zen, lehen behintzat (esan bezala gaur egun ez dut ia erabiltzen), porturik konfiguratu beharrik ez dagoela konexioak lortzeko. Emuleri portuak ireki behar zaizkio routerrean edo/eta suhesian, eta hori mundu guztiak ez daki egiten.

#6. E-mandoa eta Ares jauna

Jozulin ¦ 2008-10-16 ¦ 14:44

Neuri ere alabak eman zidan Aresen berri; e-mandoa erabiltzen nuen nik ere. Ares egokia omen da "mundu guztiak nahi duena" jeisteko (jezteko?) baina e-mulen ez dagoena inon ere ez dago, egia da, esaterako jazza edo eduki "minoritario" zenbait.

#7. Ares eta Bittorrent, zertan dira ezberdin?

johny Ustel ¦ 2008-10-16 ¦ 18:22

Nik honetaz gutxi dakit, Patxi Lopezek euskaraz baino gutxiago, baina Bit Torrent erabiltzen dut aspaldi eta galdera bat egingo dizuet:

Zertan dira ezberdin Bittorrent eta Ares?

Ein?

#8. Re: Ares eta Bittorrent, zertan dira ezberdin?

assar ¦ 2008-10-16 ¦ 21:06

Ares Galaxy, Azureus, µTorrent, BitComet, BitTornado... BitTorrent sarearen bezeroak dira, alegia, ordenagailuan instalatzen diren aplikazioak BitTorrent sarean fitxategiak partekatzeko. Baina badago BitTorrent deitzen den bezero bat ere. Sarea sortu zenean garatu zen lehen bezeroa alegia.

BitTorrent esaten denean bi gauza izan daitezke: sarea bera, edo izen hori duen bezeroa.

Gauzak gehiago nahasteko, bezero batzuek sare desberdinetan egiten dute lan. Esaterako, Aresek BitTorrent sarearekin egin dezake lan, baina bere sare propioarekin ere aritzen da, Ares sarearekin alegia.

#9. Re: Lopez lehendakari, eta Ares kultura sailburu

Luistxo ¦ 2009-04-02 ¦ 12:06

Eta mezu hau bidaltzetik hilabete batzuetara, orain Ares euskaraz

Erantzun (klik zabaltzeko)