Itzuli orri nagusira Bidali hau Tweet

Gurasolandia 2010

© cc-by-sa  Txatxilipurdi Elkartea (Arrasate) ¦ 2010-10-26 ¦ 12:20 ¦ jokoak

Zer da Gurasolandia?

Gurasolandia gurasoentzat bideraturiko ekintza sorta da, helburu duena hizkuntzaren trasnsmisioa bultzatzea eta guraso eta haurren arteko harremanak (komunikazioa, jolasak...) estimulatzea.

Gurasolandiaren bigarren edizioa da aurtengoa, iazko azaroan Uarkape pilotalekuan egin zena izan zelarik lehenengo edizioa.

Guraso eskolak etab. antolatzen dira Euskal Herri osoan, ikastetxeen eskutik adibidez. Arrasaten esate baterako ikastolak antolatzen ditu. Halere, guk, dakigula, Gurasolandiaren formatoa eta izaera bakarrak dira Euskal Herrian.

Zergatik antolatzen da Gurasolandia?

Gurasolandia antolatzen da azpimarratu nahi delako hizkuntzaren transmisioan gurasoek duten garrantzia, etorkizuneko belaunaldien hizkuntza erabileretan egungo gurasoek zerikusi nabarmena dutelako.

Nork antolatzen du Gurasolandia?

Gurasolandia Txatxilipurdi Elkarteak antolatzen du. Nolabait, osagarria da Txatxilipurdik gurasoentzat dituen beste bi jarduera nagusiekin: Asteburutako eta ludotekako gurasoentzako transmisio proiektua eta guraso.com webgunea.

Norentzat antolatzen da Gurasolandia?

Gurasolandia gurasoentzat zuzenduta dago, eurak bakarrik ala haurrekin joan daitezkeelarik. Honela, ekintza batzuk gurasoentzat bakarrik izango dira (haurrentzako zaintza zerbitzuarekin) eta beste batzuk guraso eta haurrentzat batera.

Zabalkundea batik bat Arrasaten egingo dugu bertako gurasoei begira, baina Debagoienan eta Elorrion ere pasatu dugu informazioa. Beste herrietako gurasoentzat ere zabalik daude gurasolandiako ateak.

Euskal hiztun diren gurasoentzat bideratzen dira ekintza gehienak, baina uste dugu euskalduntze bidean dauden gurasoentzat ere positiboa izan daitekeela bertan parte hartzea (mintzapraktika moduan, guraso euskaldunak ezagutzeko, euskarazko edukiak entzuteko...).

Egitaraua

Noiz izango da Gurasolandia? Azaroaren 2tik 7ra.

Non izango da Gurasolandia? Arrasateko gune ezberdinetan. Hitzaldiak KulturAte eta pleno aretoan. Kanpo ekintzak Biteri gunean eta Herriko Plazan. Masaje tailerra eta ipuin kontalariak Okendoko ludotekan eta mendi irteera eta salda banaketa Besaide eta Udalan.

Azaroaren 2an hitzaldia KulturAteko Jokin Zaitegi gelan.

• Gaia: sare sozialak. Emalea: Txatxilipurdi elkartea. Arratsaldeko 18:30an. Haurren zaintza zerbitzua egongo da.

Azaroaren 3an hitzaldi-mahai ingurua Udaletxeko Pleno Aretoan.

• Gaia: gurasotasuna. Emaleak: Iñaki Casares eta Irene Txurruka. Arratsaldeko 18:30an. Haurren zaintza zerbitzua egongo da.

Azaroaren 4an hitzaldia KulturAteko Jokin Zaitegi gelan.

• Gaia: elikadura. Emalea: Sabrina Pato, Ekolapiko egitasmoko kidea. Arratsaldeko 18:30an. Haurren zaintza zerbitzua egongo da.

Azaroaren 5an bi ekintza:

• Psikomotrizitatea KulturAteko Jokin Zaitegi gelan, arratsaldeko 17:30etatik 19:00ra. Emaleak Ianire Jaio, Maider Arrizabalaga eta Nagore Aranburu. Haur eta gurasoentzako ekintza.
• Hankapaloak eta balance-bikeak Biterin,17:30etatik 19:30ra. Haur eta gurasoentzako ekintza.

Azaroaren 6a, larunbata 4 ekintza:

• Haur masaje tailerra, Okendoko ludotekan goizeko 10:30etatik 12:00ak arte. Emalea Garikoitz Lopez de Munain fisioterapeuta. Haur eta gurasoentzako ekintza.
• Euskal dantza ikastaro-tailerra, KulturAteko Loramendi gelan goizeko 11:00tik 13:00 arte. Emalea Eneritz Urrutia. Haur eta gurasoentzako ekintza.
• Ipuin kontaketa saioa, Okendoko ludotekan arratsaldeko 17:00tik 18:00ra. Emaleak Irati Pagoaga eta Irune Iribekanpos ipuin kontalariak. Haur eta gurasoentzako ekintza.
• Mihiluze txapelketa gurasoentzat KulturAteko areto nagusian, 18:00tik 20:00ak arte. Haur eta gurasoentzako ekintza.

Azaroaren 7a, igandea 3 ekintza:

• Mendi irteera Besaidera, goizeko 9etan Arbolapetan eta 10:30etan Udalan besaidera joateko bidegurutzean. Ostean salda banatuko da Udalan. Aritz Kortabarria mendi kirolariaren laguntza eta aholkuak egongo dira haur eta guraso mendizaleentzat. Haur eta gurasoentzako ekintza.
• Sormen txokoa eta aurpegi margoketa, arratsaldeko 17:00tik 18:00ra herriko plazan Txatxilipurdiren eskutik. Haur eta gurasoentzako ekintza.
• Karaokea eta disko jaia 18:00tik 19:30 arte Herriko Plazan Txatxilipurdiren eskutik Imanol Gallego eta Amaia Lizaranzurekin.

Eskerrak:

Txatxilipurdi Elkartetik eskerrak eman nahi dizkiegu Gurasolandian parte hartuko duten aditu eta emaleei. Baita ere babesle diren instituzioei, bereziki Arrasateko Udaleko euskara sailari. Horrez gain, eskertu nahiko genieke eskainitako laguntza Gazteria eta Kultura sailei, udal ekipamenduak erabiltzen uzteagatik.

Amaitzeko, eskerrak eman nahiko genizkieke ere Gipuzkoako Foru Aldundiko euskara zuzendaritzari eta Eusko Jaurlaritzako Kultura Saileko euskara sustatzeko sailburuordetzari.

Oharrak:

• Ekintza guztiak dohakoak izango dira.
• Aukera egongo da hitzaldiak streaming bidez zuzenean ikusteko bideoz guraso.com webgunean.
• Ez da matrikularik egin beharko, ekintzari dagokion lekura agertzearekin dagokion orduan nahikoa da.
• Zaintza zerbitzua egongo da gurasoentzako soilik diren ekintzatan.
• Mihiluze txapelketari dagokionean, apuntatu beharra dago. Bi gurasoko bikoteak izan beharko dira eta haurrek ere parte hartu ahal izango dute frogaren batean, baina batez ere gurasoen animatzaile izango dira! Apuntatzeko joan herriko 3 ludoteketakoren batera edo bidali eposta bat gurasoak@txatxilipurdi.com helbidera. Irabazlearentzat sariak egongo dira!
• Eguraldi txarra eginez gero, bertan behera geratuko dira igandeko ekintzak (mendi irteera eta baita ere sormen txokoa, aurpegi margoketa tailerra eta karaokea).