Interneteko albistegia

Hezkuntza.net eta irakasle.net e-posta helbide guztiak Outlook-eko aukera ez-estandar eta itxiekin murriztuko dituzte

© cc-by-sa Sustatu ¦ 2010-04-12 ¦ 08:12 ¦ irakaskuntza

Eusko Jaurlaritzako Hezkuntza Sailak ikastetxeetan erabiltzen diren e-posta kontu guztien sistema migratuko ditu datozen egunetan, Microsoft-en menpeko azpiegitura itxi batera. Estandarrak errespetatzen ez dituen sistema izateaz gain, irakasle eta ikastetxeek orain erabiltzen dituzten aukera batzuk murriztuko dira.

Publizitatea

Migratuko dituzten e-postak, Hezkuntza Saleko guztiak dira.

@hezkuntza.net : ikastetxeak dira kontu hauen erabiltzaileak, ikastetxe bakoitzak kontu bat du domeinu honetan.
@irakasle.net : irakasle bakoitzak du hemen kontu bat, bere kontu pertsonala, eta Hezkuntza Sailak bertara bidaltzen du langileei bideratutako informazioa.

Hezkuntza Sailak ikastetxeei jakinarazi dienez, Euskaltelen azpiegitura batetik Eusko Jaurlaritzako sistema propiora migratu behar dute e-posta sistema, eta aurrerantzean, sistema berrian, bakarrik jaitsi ahal izango dira e-postako mezuak Internet Explorer eta Outlook sistema erabilita. Windows sistema eragilea eta kito, noski. Sistema berriak ez du POP3 edo IMAP bidezko konexiorik onartuko. Hauek biak dira e-postak protokolo estandarrak mezuak deskargatzeko zure ordenagailura, zure sistema eragilea edo ingurunea zein dela ere, baina migrazioaren ondoren, akabo horiek. Mezuak deskargatzeko, Outlook 2003 erabili behar da, eta kito.

Ikastetxe batzuetan Thunderbird, Eudora edo beste sistemaren bat erabiltzen badute e-posta jaisteko, akabo. Beste batzuetan, Zimbra aplikazioarekin lotuta dituzte mezu elektronikoak, bulego lanerako ingurune bat eskaintzen baitu Zimbrak; baina horientzat ere, itxiko da iturria. POP3 eta Imap estandarrekin dabiltzan sistemak dira Thunderbird, Eudora eta Zimbra, noski.

Gainera, Thunderbird eta beste bezero batzuk doakoak dira, libreak eta estandarretara egokituak izateaz gain. Outlook 2003 ordea, ez da librea, eta Hezkuntza Sailak berak argitzen du kontu hau prestaturiko galdetegian:

Non lor ditzaket Microsoft OUTLOOK 2003ko posta-bezeroa?
Microsoft OUTLOOK 2003ko posta-bezeroa ez du Hezkuntza Sailak ematen; erabiltzaileak erabili ahal izango du, baldin eta lehendik badu edo bere kabuz lortzen badu.

Zenbateko kostua dute adierazitako posta-bezeroek?
Microsoft Outlook 2003, aldiz, Microsoftek emandako bezero bat da, eta ordaindu egin behar da. Prezioa jakiteko, jar zaitez harremanetan zure ohiko informatika-banatzailearekin.

Web bidez, Outlook Web Access (OWA) deritzon sistema batetik ere kontsultatu ahal izango da e-posta, eta horrekin, Firefox erabilita irakurri eta bidali egin ahal izango dute erabiltzaileek. Hala ere, sistema hori ere Internet Explorer Microsoften sistemara dago egokitua, eta aukerak eta errendimendua ez da berdina Firefox-ekin.

Instrukzio batzuk banatu ditu Hezkuntza Sailak migrazioari buruz. Hemen duzue itsatsita dokumentu horietarik lehena, FAQ edo galdetegi bat. Beste bi dokumentuak ere sarean daude, OWA sistemari buruzko argibide batzuk, eta Outlook 2003 konfiguratzeko instrukzioak.

Erantzunak

#1. Re: Hezkuntza.net eta irakasle.net e-posta helbide guztiak Outlook-eko aukera ez-estandar eta itxiekin murriztuko dituzte

Julen ¦ 2010-04-12 ¦ 11:02

Alde batetik Open Officeren alde egiten dute eta bestalde hezkuntzarako Outlook erabiltzen behartzen dituzte.... Nahiz eta euskalteleko plataforma hobetu behar beste aukera batzuk ere badaude, nola justifikatuko dute atzera pausu hau?

#2. Re: Hezkuntza.net eta irakasle.net e-posta helbide guztiak Outlook-eko aukera ez-estandar eta itxiekin murriztuko dituzte

tolon (Pedro Arreitunandia) ¦ 2010-04-12 ¦ 11:32

Ba egia esan, ez det ulertzen nola egin duen hau behin eta berriro @irekia dela dioen administrazioak.

Sistemak aldatu dituztela? konforme, eurok jakingo dute zergatik egin duten, ez naiz hor sartuko, baina denok dakigu Exchange zerbitzariak protokolo estandarrak onartzen dituela.

Nahikoa litzateke POP3 eta IMAP protokoloak baimentzea ..., hain zaila al da ?

Ez det ulertzen :-(

#3. Re: Hezkuntza.net eta irakasle.net e-posta helbide guztiak Outlook-eko aukera ez-estandar eta itxiekin murriztuko dituzte

urrutia ¦ 2010-04-12 ¦ 12:00

Ikastetxeetan email hau ari dira banatzen Hezkuntza sailetik:

Asunto: KORREOAREN MIGRAZIOA / MIGRACIÓN DEL CORREO

Pasa den aste buruan hezkuntza.net korreo elektronikoaren plataforma migratu zen. Hezkuntza.net korreoko kontuetara Web bidez (OWArekin) edo korreo elektronikoko bezero baten bitartez (Outlook 2003n RPC HTTPSn) sartzeko eskuliburuak bidali dizkizuegu.

Web bidez korreoa irakurri nahi ez duten ikastetxeek Outlook 2003 ekiporen baten instalatzea eskatzen ari zarete. Ikusirik Tecnocomek izan ditzaken arazoak ikastetxe guztietara ahalik eta azkarren iristeko, honako hau eskatzen dizuegu: korreoa irakurtzeko erabiltzen duzuen ekipoa utzi eta Outlook 2003a duen ekipo batean konfiguratzea.

2007 urtean Sailak banatutako ekipoak (Berriztu, Oinarrizko zuzkidura informatikoaren funtzionamendu txantiloia, ...) Microsoft 2003 instalatua dute, beraz Microsoft Outlook 2003 ere bai.

Dena den, p__ kontuan jasotako Outlook 2003 instalatzeko eskaerak Tecnocomek erantzungo ditu planfikatutako era baten. Eskaera asko egon dira eta denbora eramango du denak erantzutea.

#4. Outlook ezartzen ikastetxeetan

Luistxo ¦ 2010-04-12 ¦ 12:38

eskerrik asko, ikusi dut hori sartu duzula.
Bitxia da gutun horren kontua. Aurretik banatutako eta hor goian itsatsitako instrukzioetan, bakoitzari esaten zaio Outlook bere kasa jartzeko, hortik joan eta lortzeko... Baina gutun horretan ulertzen denez, ikastetxeak ez dira Outlook "hortik" lortzen ari, baizik eta zera esaten ari direla ematen du:

- eposta jaisteko Outlook behar dugula, ba jarri iezaiguzue Outlook hori, benga!

Alegia, ikastetxe askotan badirudi Outlook gabeko mezularitzan zeudela, eta bazen hori zerbait, ezta? baina orain, Outlook premiarik ez zutenek ere, tori Outlook. Gutunean Outlook etxez etxe jartzeko lan horiek denbora hartuko diela onartzen du Jaurlaritzak. Baina ondorioa argi dago, ezarriko da, antolatuko dira txandak, eta jarriko da etxe bakoitzean: azkenean. MS-dependentzia handiagoa zentroetan (etorkizunean lizentzia gehiago erosi behar MSri), eta Windows ez den sistemen zokoratzea.

#5. Atzeraka

Alex ¦ 2010-04-12 ¦ 19:25

Irakaskuntza publikoan software librearen alde urratsak ematen ari garenok administrazioarengandik laguntza jaso beharrean oztopoak besterik ez dugu topatzen, lehen eta orain. Microsoften besarkada itogarritik askatzeko asmorik ez da ikusten.

#6. Re: Hezkuntza.net eta irakasle.net e-posta helbide guztiak Outlook-eko aukera ez-estandar eta itxiekin murriztuko dituzte

gorkaazk ¦ 2010-06-04 ¦ 05:13

irakasle.net kontu bat genuenok, eta dugunok, aspaldian konturatu ginen alferrik daukagula.

Nik horrelako kontu bat urtetan zabalik izan dut, banatzen hasi ziren unetik ziur aski. Aspaldiko urteotan, urtean behin-edo zabaltzen dut hezkuntza kontseilariaren zorion agurrak irakurri gabe ezabatzeko, egun batzuetan zerbitzurik gabe egongo garela iragartzen dizkiguten oharrak ezabatzeko, eta horrelako bestelako spam batzuk ezabatzeko.

Berritzeguneetan informatikaz badakien norbaitek ondo aholkatuta urtetan ibili ziren squirrelmail batekin irakasle.net posta zerbitzuari izkin eginez. "Goitik" agindua ailegatu zitzaien, squirrelmail uzteko agindua eta irakasle.net horretara lerratzeko kontsigna. Berritzegune askotan gmail eta enparauetara igaro dira, jakina, irakasle gehienak bezala.

Irakasle.net erabiltzeko Outlook behar dela? Nori axola? Nork erabiltzen du oraindik irakasle.net? (Berria zaharra denean enteratu naiz, nola ez).

Gehiago kezkatzen nau, haserretzen nau hobeto esateko, askotan ezin izaten ditudala hezkuntza administrazioak banatzen dituen hainbat informazioetara iritsi, web ofizialean esaterako. Software librea erabiltzen dudalako izango da? Informatika kontuez gutxi dakit baina hala iruditzen zait.

Erantzun (klik zabaltzeko)