Itzuli orri nagusira Bidali hau Tweet

Jaurlaritzaren laguntzen banaketa eta webguneetako kontagailuak

© cc-by-sa  Sustatu ¦ 2006-03-22 ¦ 09:46 ¦ dirulaguntzak

2005eko jardunerako laguntzak, berak, 2006ko udaberria hasitakoan egin dira publiko. Deialdia bera ere urtea amaitzearekin batera etorri zen, azaroaren amaieran, Sustatun argitaratu genuenez.

Ondoren, aurtengo urtarrilean, laguntza hauekin lotutako mugimendu bitxi bat gertatu zen Interneteko euskal esparruan: kontagailuak azaldu ziren hainbat webgunetan (Sustatun ere orduan egin genituen publiko geureak). Laguntzekin lotutako baldintza honek ekarri zuen hori: Diruz lagunduko diren atari eta webguneen kasuan erabiltzaile-kopurua neurtu ahal izateko modua eduki behar dute eta, aldi berean, ikusgai egongo da pantailan eskabidea egiteko epea bukatu orduko.

Baldintza hau funtsezkoa suertatu da webgune batzuk laguntzarik gabe uzteko, azkenean, ebazpenean irakurtzen denez.

Sustatun albiste horren harira argitaratu genuenez, kontagailu horiekin erakusten dena oso gauza desberdinak dira (funtsean bakoitzak eskura duena edo nahi duena jar dezake), eta zer kontatu nahi duen Jaurlaritzak ez dago argi.

Diru banaketa

Laguntza handiena jaso duten proiektuak honako hauek dira:

• Elhuyar Fundazioaren Zientzia eta teknologiaren corpusa (54.992 euro), Zientzia.net (49.515) eta Zernola.net (30.738).
• Suspergintza Elkartearen Nontzeberri.com (40.085 euro)
• Errobi Promotions Elkartearen Radiokultura.com (24.780 euro)

Esleipen guztia EHAA buletinean duzu.

Sustatu ez da ageri jasotzaileen zerrendan, ez baita deialdi honetara aurkeztu. Jaurlaritzaren lehenagoko beste deialdi batera (euskarazko hedabideentzakoa) aurkeztu genuen webgune hau, eta 6370 euro jaso zituen hartatik 2005.eko jardunerako. Esleipen hartaz informazioa hemen.

 Nabigatu euskaraz