8000 CDz egindako begitarte edo smiley-a Bilbon

Ezaguna den bezala, begitartea, emotikonoa edo smileya, sinbolo grafiko bat da , posta elektroniko bidezko komunikazioetan erabiltzen dena eta bidaltzen duenaren aldartea adierazteko balio duena.

Covadonga Valdés Moré artista k diseinatu duen muntaia handi honetarako Deustuko Unibertsitateak :-) begitarte edo smiley-a aukeratu du, poza adierazten duena, nazioarteko lehiaketa honetara datozen bisitariei eta ikusleei ongi etorria eman nahian, zirkuitua Deustuko campusaren aurretik pasatuko baita, eta Deustuko Unibertsitateko ikasleen ilusioa eta atxikimendua adierazteko kirol honekiko.

Poza adierazten duen begitarte hori osatzeko 8.000 disko inguru beharko direla uste dute.

Deustuko Unibertsitateak adierazi duenez, proiektua hain da handia, zerutik baino ezin izango da ondo ikusi, telebistako irudiak jasotzeko ibiliko diren helikopteroei esker; beraz, azken lana telebistatik baino ezin izango da hauteman.

Hala ere, instalazioaren plastika campusa bisitatuz gozatu ahal izango da, milaka CDen distirak ikustean.

CDak birziklatzea

Begitarte handi hori egiteko aukera aprobetxatu nahi da, Sarbide euskal enpresaren laguntzarekin, errepresentazio artistikoa egiteko erabiliko diren CDak birziklatzeko.

Gertaera bukatuta, enpresa honek CD guztiak bildu eta birziklatu egingo ditu era kontrolatuan, % 99an prestazio altuko polikarbonato injektatuzko diskoak era ez selektiboan apurtzeak ekarriko lukeen ingurumeneko eragina ahalik eta txikiena izan dadin.

Izan ere, euskarri optikoen erabilera nabarmen handitu da azken urteotan eta produktu hauen eskari handiak ingurumenean eragina duten hondarrak sortarazi ditu. Horretan datza, hain zuzen ere, birziklatzearen garrantzia, ingurumenerako ez ezik ekonomikoki ere onuragarria baita. Polikarbonatoa errekuperatzean lehengai horren kontsumoa gutxitu egiten da eta balio erantsi handiko produktu berrietan berrerabil daiteke: autoen faroetan, sakelakoen karkasetan edo teklatuetan, besteak beste.