Itzuli orri nagusira Bidali hau Inprimatu

Literatura eskola antolatu dugu Larrabetzun

bbk - bihotz bakartien kluba ¦ 2003-10-03 ¦ 13:58 ¦ Kultura

Irakurtzen ikasi gura dugu, leiduten duguna ulertu. Jakin gura dugu erakutsi diguten literatura establezitutik haratago ezer idatzi den, nork idatzi duen eta zergatik; nork erabakitzen duen zer den benetan literatura, zer esan eta esan behar dion euskal literaturak munduko literaturari.

Publizitatea

Bihotz Bakartien Klubak irakurlearen matxinada aldarrikatu du bere sorreratik, irakurlearen parte hartze aktibo barik literatura agoniara kondenatuta dagoela uste dugulako. Horixe da Larrabetzun Literatura Eskola antolatzearen arrazoia. Urrian hasi eta ekainean bukatzeko, hilean larunbat goiz batez bilduko gara.

Literatura aktiboa aldarrikatuz, bermatuko dugu eskolak biziak izatea, oso dinamikoak, eztabaidak nagusi izatea, dakitenen eta ez dakitenen arteko etengabeko hartuemona eta inork pentsatzen duena esan barik ez geratzea. Eskolen ardura Iņigo Aranbarri idazlearena izango da. Bera izango da irakasle eta artezlea. Horrez gain, zenbait gairi buruz berba egiteko gonbidatuak edo hizlariak izango ditugu.

Gai zerrenda eta gonbidatuak:

Pizkundea: Aitzol modernitatearen kontra

Banguardien arriskuak: Vladimir Maiakovsky eta Aime Cesaire. Gonbidatua: Jose Luis Otamendi.

Literatura Aldizkariak: Euzko Gogoatik gaur egunera. Gonbidatua: Mikel Elorza.

Kazetaritzatik literaturara. Bi eredu: lekukotasun historikoa eta bidaia kronikak. Gonbidatua: Alberto Barandiaran.

Gabriel Aresti. Gonbidatua: Koldo Izagirre.

Joseba Sarrionandia: denbora eta espazioa

Antzerkia Euskal Herrian. Gonbidatuak: Mikel Martinez, Josu Kamara, Antton Luku eta Antzerkiola Imaginarioa.

Antilogika arma legez: Pernando Amezketarra eta Nikola Agirre Metxa

Silvia Plath, Alejandra Pizarnik eta Anne Sexton: Heriotzaren marka. Gonbidatua: Kirmen Uribe.

Erantzunak

#1. Noiz eta non

bordaberria ¦ 2003-10-04 ¦ 07:08

Gustatuko litzaidake jakitea, programaz gain, noiz eta non egingo diren topaketa edo hitzaldi hauek.
Nire ustez irakurleok batzutan gogoa izaten dugula irakurri dugunaz hitz egiteko eta beste irakurleen iritziak jakiteko, ez bakarrik idazleenak. Horregatik nire ustez solasaldiak edo tertulia literarioak bultzatu beharko litzatekez modu librean, hau da, izenburu gaberik.
Beraz hau da nire aholkua: hilean behin, mahi baten inguruan Uribe-txorierriko literaturzaleok bi-hiru ordutan biltzea, bertsolariak bezala, "gai librean" jarduteko, besterik gabe.
Dena den, zorionak zuen ekimenagatik.

#2. Eskola libreak dira

Bihotz Bakartien Kluba ¦ 2003-10-06 ¦ 08:50

> Gustatuko litzaidake jakitea, programaz gain, noiz eta non egingo diren topaketa edo hitzaldi hauek.

Informazioa www.armiarma.com/eskola helbidean dekozu, ostantzean urrats@kaixo.com helbidera mezue bota eta erantzungotsu.

> Nire ustez irakurleok batzutan gogoa izaten dugula irakurri dugunaz hitz egiteko eta beste irakurleen iritziak jakiteko, ez bakarrik idazleenak. Horregatik nire ustez solasaldiak edo tertulia literarioak bultzatu beharko litzatekez modu librean, hau da, izenburu gaberik.

Gaiek aurrez finkatute badauz be, argi dekogu irakurleon artean sortu leitekezan eztabaidak edo iritzi trukeak ez doguzela ebagiko, baina eraginkorragoa deritzogu gai batetik hasiteari. Ganera, jakizu eskoletan danon parte hartzea ziurtatu gura dogula.

> Beraz hau da nire aholkua: hilean behin, mahi baten inguruan Uribe-txorierriko literaturzaleok bi-hiru ordutan biltzea, bertsolariak bezala, "gai librean" jarduteko, besterik gabe.

Ezta ideia txarra eta eskolan horren ganean berba egiteko aukera be eukiko dogu

> Dena den, zorionak zuen ekimenagatik.

#3. Berriak albistea be badakar

irakurle batek ¦ 2003-10-07 ¦ 11:53

Literatura aktiboa aldarrikatzeko eskola albistea dakar gaurko Berriak.

Ni neu izena emotera noa, izan ere Interneten ikusi berri dut programa osoa, eta erakargarri egiten zait, Literaturaren inguruan, -euskal literaturan batipat- aktibotasuna behar dela ikusita.

Erantzun artikulu nagusiari

Pil-pilean!

Erantzun gehien izan dituzten albisteak