Itzuli orri nagusira Bidali hau

DKA: Kulturarako topagune berria Durangon

Anboto - Durango ¦ 2002-12-18 ¦ 17:50 ¦ kultura

Durangoko Kafe Antzokia aurkeztu da gaur jendaurreran. Andoni Egaña bertsolaria, Joseba Tapia musikaria eta Mikel Urdangarin izan dira Durangoko Kafe Antzokiaren lagunen izenean aritu direnak Beñat Gaztelu-Urrutiak gidaturik. Hurrengo Durangoko azokarako zabalik egongo da Antzokia.

Publizitatea

Berbaro, Durangoko euskara elkarteak, Durangoko Kafe Antzokia (DKA) egitasmoa aurkeztu du gaur goizean Durangoko Kurutziaga Hotelean.

Beñat Gaztelu-Urrutia DKAko arduradunak esan duenez, datorren urteko abendurako eginda egongo da Durangoko Kafe Antzokia. Berekin batera euskal kulturgintzako eta DKAko hainbat lagun izan dira prentsa aurrean: Andoni Egaña bertsolaria, Joseba Tapia musikaria eta Mikel Urdangarin kantaria.

Oraintxe da sasoia DKAren kanpainaren berri emateaz gain, gonbidatuek horrelako kultura gune baten garrantzia azpimarratu gura izan dute.

  • Egañak azaldu duenez, “orain dela 14 bat urte izan zen lehenengoz Berbarok antolatutako bertso afari batean eta ordutik, gustura asko etorri izan da berriz, ‘berbarotarrek’ tajuzko antolakuntza eta harrera goxoa egiten dakitelako”.
  • Tapiak proiektuaren alde egiteaz batera, beste kultur gune batzuk hartu duten bidea alde batera laga eta guztiontzako topaleku izateari eusteko eskatu diete Berbaroko lagunei.
  • Mikel Urdangarin abeslariari tokatu zaio, gertutasun geografikoagatik (bera zornotzarra da), aretoak Durangaldeari —eta euskal Herriari— ekarriko dion aberastasunaz jardutea. Eta berak, dagoeneko, DKA SLk saltzen jarri dituen 200 euroko 5.000 akzioetako bat erosi duela agerian utzi du. Izan ere, Berbarok proiektua zutik jartzeko 1.000 miloiko kapitala behar du eta diru hori lortzeko 200 euroko akzioak jarri ditu salgai, Oraintxe da sasoia kanpainaren barruan.

Aurkezpen ekitaldian, aurretik aipatutakoez gain, Jon Ander Ubeda (Bide Ertzean), Igor Elortza (Bizkaiko bertso txapelduna), Petti (abeslaria), Rafa Rueda (PILTko kidea), Unai Iturriaga eta Xabier Amuriza (bertsolariak), Igor Arzuaga (musikaria) eta Asier Serrano (idazle eta musikaria) ere izan dira, proiektuaren alde egin guran.

Erantzunak

#1. Prentsaurrekoaren berri biharamunean

editorea ¦ 2002-12-19 ¦ 09:48

Berri hau gaurko egunkarietan

Berri hau gaurko egunkarietan

#2. Erreferente bat zarete

Egoitz (Plaentxia) ¦ 2002-12-21 ¦ 13:23

Zorionak Berbaro!
Berri pozgarrixa izan zan Durangon Kafe Antzokixa zabaldu bihar dozuela jakitzia eta pozgarrixagua egitasmua errealitate bihurtu dala jakitzia. Durangoko azokan jakin neban jentiak akzioen bidez parte hartzeko aukera zabaldu zendutela. Sistema bikaina pentzau jatan eta itxura danez erantzun ona jaso dozue. Gustauko litzaidake punto honetan zela juan jatzuen jakitzia.
Jakin, egiten dozuen lana jarraitzen dogula eta Berbaro erreferente moduan ikusten dogula hemen; aldizkarixa, elkartia, taberna eta oin Kafe Antzokixa sortzeko eruan dozuen dinamikiagaittik eta abar.
Jarraittu gogor, lan bikaina egitten diharduzue eta!
Zorte on!


#3. DKAren akzio salmenta

Jabi Ulazia ¦ 2002-12-21 ¦ 13:42

Egoitzek dioenaren haritik... Non eros ditzakegu akzioak? eta akzio erosketa horrek zer esan gura du. Dirua sartu eta gero ahaztu egin behar dugula edo inoiz bueltatzeko asmoa ere badago, edo irabazien ehuneko bat jasoko da edo...

Edo militantzia da eskatzen dena?

Beharbada animatuko naiz, baina beste galdera bat: badu zerikusirik Bilboko Kafe Antzokiarekin?

DKA: izen xelebrea, ezta?

Erantzun (klik zabaltzeko)

Publizitatea