Euskadi Informazio Gizartean egitarauaren aurkezpena
Eguerdian eman dute Josu Jon Imazek eta Idoia Zenarruzabeitiak datorren urteetan EAEn bultzatuko diren proiektuen berri. Hainbat ekitaldi eta ekimen aurkeztu dira Eusko Jaurlaritzan egindako aurkezpenean. Hilaren 20an aurkeztuko du Ibarretxe lehendakariak "Euskadi Informazioaren Gizartean" zehaztasun handiagoekin. Kursaal aretoan izango da, baina aurrez Sustatuk jaso du gaur esandakoa.
Euskadi eraldaketa berri baten aurrean dagoela esan du Josu Jon Imazek (Industria, Merkataritza eta Turismo Sailburua). Enpleguan zein teknologian Europaren pare dago. Orain, hurrengo apustua Informazio Gizartea finkatzea izango da Euskadi lehiakorragoa izateko.
Hau guztia ez da zerotik hasten, ordea. Estatuan internet konexioetan 8. egotetik Katalanekin batera buruan egotera pasa gara. Abenduko datuak dira, baina loturetan %6,5 edukitzetik %27 izatera pasatu gara. Enpresetan ere Europa mailan dagoen ekipamendu bera erabiltzen dela nabarmendu du Industria Sailburuak. Datu horiei gaineratu die Zenarruzabeitia lehendakari ordeak, 4 hilabetetan EAEn 26 internet-leku zabaldu direla (laster beste 7). Bertan edozeinek nabigatu dezake eta baita ikastaroetan pare hartu ere. Gainera 121.000 ordenagailu lagundu dira Konekta zaitez kanpainarekin.
Zenarruzabeitiak zehaztu du orain mugimendu industrialetik informazio gizartera eman behar dela pausua. Erlazionatzeko zein bizitzeko modu berriak aztertu behar ei dira. Orain erronka eta aukera dugula zehaztu du prentsa aurrekoan.
Hemendik aurrera sei esparrutan egingo du lan gobernuak:
- Interneta denontzako izan dadin. Sarearen onurak edozein biztanlerengana heltzeko.
- Formazioa: Teknologia berriak erabiltzen ikasteko formazio jarraituaren bidez.
- Gobernu elektronikoa Eusko Jaurlaritzak, esaterako, etsenplu izan behar du, eredu. Seguritatea bermatu behar du eta firma elektronikoa landu.
- Euskadi sarean:Euskadiren difusio kulturala eta euskara zabaldu Euskadiren irudia salduz.
- Enpresa digitala:Enpresen lehiakortasuna hobetu, bai enpresa "tradizionalak" teknologia berriei egokituz, bai proiektu berriak bultzatuz.
- Osasuna: Osakidetza ardatz hartuta harremanak egiteko modu berritzailea bultzatu, esaterako txandak internetez hartuz edo osasun txartel interaktiboa bultzatuz.
Zenarruzabeitiak esandakoaren arabera, errenta parametroetan Europaren parean gaude. Langabeziak behera egin eta laster parekatuko omen gara Europako datuekin, eta orain aurrea hartu beharra nabarmendu zuen Informazio Gizarteari dagokionez. "Euskadi gizarte guztiz europeoa" dela esanez amaitu du aurkezpena.
Hau guztia aurrera eramateko hainbat ekitaldi otsailean:
- 14an: Europa Jauregian, Gasteizen informazio gizartearen II. Kongresua.
- 15ean Gasteizen karpak zabalduko dira teknologia gizarteari gerturatzeko. Karpak Desanparados plazan eta Fueros-en egongo dira.
- 20an Kursaalean aurkezpen publikoa. Ibarretxe lehendakariak aurkeztuko du "Euskadi Gizartearen Informazioan " plana. Kanpainak irauten duen denboran autobus bat egongo da herriz herri ibiliko dena 16 ordenagailurekin.
- 21ean Augustin Jauregian, Gasteizen, Arte ederretako museoan, harrera egingo zaie Europako zientzia, teknologia, berrikuntza eta gizarte informazioaz arduratzen diren ministroei.
- 22an Gasteizen, Europako ministroen bilera informala.
- 23an Kzjaieguna: Bilboko Nazioarteko Erakustazokan izango da 10:00etatik 22:00etara. 5000 lagun espero dituzte antolatzaileek. Bertan e-comerce, errealitate birtuala, emanaldiak, gazteenendako jokuak... egongo dira. Edade guztiendako jaia izango da.
Azkenik beste proiektu bat ere aurkeztu du eguerdian Josu Jon Imazek: e-debagoiena ziberraldea deitua.
Hurrengo asteetan Gatzagan egingo den aurkezpenaren berri ere eman da. Lehen ziberraldea garatuko da Debagoeienean eta programa hau pilotua izango da. Parte hartzaileen artean: Eusko Jaurlaritza, MCC, Mondragon Unibertsitatea, Debagoieneko Mankomunitatea, Euskaltel eta Goiena komunikazio zerbitzuak.
Erantzunak
> Arrazoia du Jabik. Gainera, letra larriz (maiuskulaz) idazten da, eta deklinatzen da toki izen bat balitz bezala. Esate baterako, Detroit deklinatuko genukeen bezala.
Handia da beste behin ere ilargia erakusten digutenean hatzamarrari begira geratzea. Konturatu zarete euskaldunok zenbait hitzegiten dugun euskarari buruz ?
>
> Handia da beste behin ere ilargia erakusten digutenean hatzamarrari begira geratzea. Konturatu zarete euskaldunok zenbait hitzegiten dugun euskarari buruz ?
Eta euskarari buruz berba egitea txarra da ala? Zeren ganean gura dozu ba eitea? Orduan etorriko dira kezkak, ez euskarari buruz, ezta euskaraz be berbarik egingo ez dogunean. Orduan alferrikakoak izengo dira bai internet eta bai Euskadi guztiak, informazioaren aroan egon, edo lapikoaren aroan egon. Alfer alferrik. Ein daigun oin berba, ein daigun euskaraz, eta ziurta dagigun euskara arlo eta alor guztietan egongo dala, eta ahal dala egon dadila txukun eta zuzen.
euskara jalgi hadi mundurat!
> Eta euskarari buruz berba egitea txarra da ala? Orduan alferrikakoak izengo dira bai internet eta bai Euskadi guztiak.
Ba hoixe. Hemen artikuluan eta baitta nik idatzitakoan ere internet idazten genuen eta ez Internet. Hemendik aurrera, eta hainbat jenderen iritzia lortu ostean Jabi, Joxe, UZEI, Goienkariako zuzentzailea...:
Maiuskulaz idazten dugu, izen propio gisa, hau da, erakunde baten tratamendu bera ematen diogu. Internet mundu osoan bakarra baita.
Aldiz, intranet minuskulaz erabiltzen dugu, sare lokal bat bezala denez, milaka intranaet daude munduan...
Ados nago Mikel delako horrek esaten duenarekin. Internet munduan gabiltzanondako iraultzatxo bat dator eta berri honek erakusten duela iruditzen zait. E-debagoiena proiektuarekin guk zuzen-zuzenean parte hartuko dugu. Ia hemen egindakoa zabaltzeko modukoa den.
> Eta euskarari buruz berba egitea txarra da ala? Zeren ganean gura dozu ba eitea?
Bada, Euskadi Informazio Gizartean izeneko egitasmo anbiziotsua aurkezten denean sinale ona litzateke ekarpen mordoa egotea horren gainean, ea egitasmoa egokia den edo propaganda hutsa, ea zer dagoen jokoan sarean, zer egin behar den helburu hau edo hura lortzeko... Eta tartean norbaitek hiztegi konturen bat aipatzen badu, ba ondo. Baina hori izatea bakarra...
Zehaztapen bat: "interneta" barik "Internet" idatzi behar da, izen propioa da, maiuskulaz eta "a" gabe, Olentzero "Olentzeroa" ez den bezalaxe (Internetek, Olentzerok, Interneti, Olentzerori...).