Itzuli orri nagusira

Sustaturen sariketa: euskal blogetako mezurik onenari saria

Sustaturen 5. urteurrena ospatzeko egingo diren ekitaldien artean sariketa ere antolatu dugu. Gaur hasi eta abenduaren 11 aurretik euskarazko blogosferan argitaratzen den blog mezu edo antzeko eduki interesgarriena sarituko du Sustatuk.

Blog mezua proposatzeko, erantzun-hari honetan utzi erantzuna.

Sustaturen urteurren sariketa

Orain egun batzuk argitaratu genuen moduan, Sustatuk 5 urte bete ditu hil honetan. Urteurrena ospatzeko zenbait ekitaldi antolatuko ditugu, eta euren artean, sariketa hau.

Gaur hasi eta abenduaren 11 bitartean, euskarazko blogosferan argitaratzen den blog-mezu edo antzeko eduki interesgarriena sarituko du Sustatuk.

Artikulu interesgarri bat, argazki edo bideo bat (blogariak berak egina, noski), okurrentzia bat edo erantzunetan eztabaida piztu duen ustekabeko artikulua, albiste original bat... Halako post onena sarituko dugu.

Arauak

Sariketan parte hartzeko, ondorengo arauak jarraituko ditugu:

  • Blog euskaldun batean egon beharko da artikulua, eta euskaraz.
  • Argazki-blog hutsen eta bideo-blogen kasuan, euskarazko blog komunitate batean (esate baterako, Goienakoa, Mahatserriko blogak, Baleike ,...) edo blogak sortzeko plataforma euskaldun batean (Blogari.net, Blogak.com, Mundua.com ...) egon beharko da.
  • CodeSyntax eta Goiena enpresetako langileak ezingo dira aurkeztu.
  • Blog mezua sariketara aurkeztea edonork egin dezake, norberak berea edo edonork beste batena. Horretarako Sustatuko erantzun-hari honetan utzi beharko du abisua: nor den egilea eta zein mezu proposatu den sariketara. Erantzuna emateko orduan, adi, e-posta bidezko konfirmazioa eskatuko zaizu.
  • Blogari bakoitzak hiru mezu aurkeztu ahal izango ditu gehienez.
  • Epaimahaia CodeSyntax eta Goienako partaideen artean osatuko da, eta abenduaren 12an erabakiko du zein den sariduna. Epaia aldaezina izango da.
  • Lehen saria, bakarra: iPod bat (80 Gb)
  • Aurkeztutako gainerako guztien artean, bi iPod nano (2 Gb) zozketatuko dira.

Sari-banaketa abenduaren 13an Arrasaten

Sari-banaketa abenduaren 13an egingo da, Arrasateko kultura etxe berrian. Ekitaldi horretan ospatuko dugu Sustaturen 5. urteurrena, lagun artean eta ekitaldi berezi batekin. Hemen dago informazioa eta izena emateko, datu-orri hau bete mesedez.

Sariketa honetan parte hartzen dutenen artean (irabazlea salbu), bi iPod nano zozketatuko dira. Urteurren-ekitaldian egingo da zozketa eta bertaratutako blogarien artean egingo da zozketa (sariketara aurkeztu direnen artean). Adi, beste batzuen blog mezuak proposatu badituzu, ez zara zeu sartzen sariketan, blogari horiek baizik, eta joaten badira bakarrik sartuko dira zozketan. iPod bat nahi baduzu, ez lotsatu, eta zeure burua proposatu.

Oharra: lehiaketan parte hartzeak berak esan nahi du arauok onartzen direla: batetik, oinarri hauek oso-osorik; bestetik, lehiaketaren antolakuntzak oinarriak ulertzeko eduki dezakeen era.

Proposamenak egiteko

Blog mezua proposatzeko, erantzun-hari honetan utzi erantzuna.