Teknologia albisteak

Youtubeko ordainpeko kanalak iraultza izan daitezke ikus-entzunezkoen banaketa eta kontsumoan

Sustatu

2013-05-10 : 13:58

Zurrumurruak duela egun batzuk piztu ziren bat-batean, Youtubeko ordainpeko kanalak datozela... Eta segituan gauzatu da, hemen dira Youtubeko ordainpeko kanalak (interfazea, Youtubeko gainerakoak bezala, euskaratua dago jada), eta sekulakoa izan daitekeela ematen du. Iraultza bat telebistaren eta ikus-entzunezko ekoizpenen munduan.

Youtubeko ordainpeko kanal bat

Google/Youtube-ren iragarpen ofizialean diote kanalen harpidetzak dolar batean (0.99) direla, baina ez da horrela zehazki. Ematen du bakoitzak bere prezioa ezar dezakeela. Disponibilitatea ere, geografikoki antolatzen da. Horra topatu ditugu kateetako batzuk:

CubaPlay TV. Telebista kubatarra, ez dakigu benetan Kubakoa ala Miamikoa, baina badirudi AEBetan hilean 5 dolar ordainduta lor daitekeela. Ezin da Euskal Herritik ikusi.
Digital Theatre. Hau ere ezin da hemendik ikusi, eta prezioaz ez dugu argibiderik aurkitu. baina a ze nolako aukera: antzerki britainarra grabatzen dute definizio handian, eta hortxe dituzu antzezlanak, gaurkoak eta klasikoak, ikusteko moduan.
Es.Tv hau ikusi daiteke Euskal Herrian. 1.5 euro da harpidetza. Izatez, kanal multzoak ere badaude, eta hori honako multzo honetan sartua dago.
Goiko irudikoa, inspirazio edo ikasketerako hizketaldiak direla ematen du, Big Think Mentor.

Badirudi ordainpeko Youtube honek eskainiko duela, streaming zerbitzu bat erraz antolatzeko tresna bat, inolako gorabehera tekniko barik, Filmin edo Netflix-ek bezalako bat ia edozeinek antolatzeko moduan: igo materiala Youtubera eta egina. Eredu ekonomikoa izan daiteke, pentsatzekoa denez, ordainketaren komisioa hartzen duela Google/Youtubek. Zenbateko portzentaiaz ez da informatu oraingoz, eta zerbitzua edukitzeagatik beste ostatatze gastu batzuk ba ote dauden ere ez da jakinarazi. Kanalak irekitzea oraingoz ez dago edozeinen esku. Nola irekiko den aukera ere ez dago argi.

Youtubeko ordainpeko kanalak

Ikus-entzunezkoak ekoitzi eta banatzeko modu berri bat has daiteke sistema honekin. Dokumental ekoizle batek, adibidez, zer modu zuzenagorik monetizatzeko filmak, zerbitzu honetan jarri baino? Ez da da benetako euskarazko telebista pribatu posible batentzat bidea halako eskema bat? Beranduegi-ren etorkizuna, agian?

Ikusleen aukeraren aldetik ere, pentsa antzerki ingelesa gustatzen zaizula. Ordaindu euro pare bat hilabete baterako, eta ikusi Digital Theatre-ko artxiboa 30 egunez. Gero, jarraitu dezakezu ikusteko ea ze ekoizpen gehitzen duten, edo besterik gabe eten harpidetza, baina ikus-entzunezkoen kontsumo legala, merke eta eskuragarri, ezin errazago eta erakagarriagoa bihur daiteke.

Erantzunak

Marijo Deogracias #1

2013-05-10 : 15:14

Egunotan AEBn sortutako web bidezko telebista adibide batzuk jarraitzen nabil, lantxo baterako, eta aldea nabarmena da weberako pentsatutako telebista informatiboen eta webean ere euren edukia erakusten duten telebista informatiboen artean. Saioen iraupena, dinamismoa, zuzenekoetarako azpiegitura, kanpo konexioak (seinalearen kalitatearen parametroak zeharo aldatu dira), programazioaren antolaketa, azpitituluen erabilera…
Hasi besterik ez naiz egin, baina gai oso entretenigarria da.
Bide batez, web telebsita adibideen bila nabilenez, proposamen guztiak ondo etorriak dira.
Eskerrik asko

Patxi Azpillaga #2

2013-05-10 : 18:17

Argilun gehiegitxo oraindik baina hala eta guztiz ere oso-oso interesgarria. Garai batean Youtube hasi zenean inor gutxik uste zuen gaur dena izatera helduko zenik ere. Eredu berri honek potentzial handia dauka gaur egungo ikus-entzunezko sistemen egiturak eraldatzeko. Ekoizle-programatzaile-hartzaile katea klasikoa aldatzen hasita zegoen jada baina honek aukera are zabalagoak eskaintzen ditu, dudarik gabe. Kapaza izango ote da ordea benetan ordainketa aktibatzeko? Ekoizle eta hartzaileen arteko lotura zuzena pizteko? Crowdfunding-ak egina du bidea horretan, baina ekimen solteak dira haiek... Ea ba, adi egon beharko!