Bost urte euskaraz dihardugula Twitterren

Luistxo Fernandez | Internet | 2012-03-19 : 12:03

Duela bost urte nago Twitterren. Eta 2007ko martxoaren 19 hartan, gaur bezala astelehena, bidali nuen neure lehen tuita, euskaraz. Ba ote euskarazko tuitik lehenago? Oso litekeena da: Hitz Kareaga @Bocadorada da, nik uste, Twitterreko lehen erabiltzaile euskalduna, 2006ko abendutik, eta Jokin Lacalle @jolaus 2007ko otsailean hasi zen. Poz handia emango lidake neurea baino lehenagoko haien (edo beste norbaiten) tuit euskaldun baten aztarna aurkitzeak.

Erreferentzia: https://twitter.com/#!/luistxo/status/9567941

Erantzunak

Sustatu | 2012-03-19 : 13:34 | #1

Zein da euskarazko lehenengo tuita? Ez da erraza jakitea. Horretan gabiltza, baina tuiterlarien laguntza beharko dugu.

Bi tresna ditugu lehenengo tuiterlari eta tuit euskaldunak aurkitzeko.

UMAPek egungo euskal tuiterlarien zerrenda ematen digu. Horien artean Hitz Kareaga @Bocadorada da "beteranoena" (2006ko abendutik Twitterren). Berea da Twitter-ID erabiltzaile txikiena. Baina euskaraz tuiteatu zuen? Berea ote euskarazko lehenengo tuita? UMAPek ez ditu hasierako tuit haiek bildu.
Twitterreko erabiltzaileen lehenengo tuitak aurkitzeko beste tresna bat ere badugu: My first tweet. Erabiltzailea sartu eta bere lehenengo mezua ematen dizu. Arazo bat du, baina: azken 3000 tuitak bakarrik erakusten ditu; gehiago idatzi badituzu, ez duzu hor aurkituko.
Orain arte aztertu ditugun erabiltzaileen artean, badirudi duela 5 urte inguru idatzi zela lehenengo euskarazko txioa. @luistxorena 2007ko martxoaren 19ko goizeko 8.23koa da. Garai beretsukoak dira, ziurrenik, @teketenek, @eastigarragak, Jolausek eta bestek idatzitakoak.
Norbere tuit guztiak CSV fitxategi batera jaisteko aukera ere badago sarean, besteak beste, Tweetake.com webgunearen bidez.

Zorionak guztioi, beraz. Euskarak 5 urte bete ditu Twitterren.

joxearanzabal | 2012-03-19 : 20:43 | #2

Nire kasuan, goiz samar egin nuen kontua, zeren 1 faboritoa 2006ko martxoaren 21ekoa dut, baina nire lehen tuita 2007ko irailaren 6koa da.

haritz rodriguez | 2012-03-20 : 11:16 | #3

Ze oroitzapenak! Nire lehenengo tuita 2007ko martxoaren 24koa da, ordu txikietan idatzia gainera!

Erantzun

Sartu