Sinadura bilketa euskaldunek ez dezaten ETBn gaztelaniaz egin
ETBko elkarrizketak, adierazpenak,e.a. euskaraz eta gaztelaniaz jaso beharrean, euskaldunen adierazpenak euskara hutsez jasotzea eskatzeko sinadura bilketa antolatu dute.
Eredugarri gerta daitezkeen pertsonak behin eta berriz adierazpenak euskaraz egiten ikusteak (erdal kanalean azpitituluz osaturik) euskaltzaletasuna ereiten du ikusleen bihotzean emeki eta etengabe.
Izena eta e-maila emanez sinatu daiteke testua formulario baten bitartez.
Euskararen Semaforoa blogaren bidez izan dugu eskaeraren berri, baina ez dugu aurkitu nork jarri duen abian kanpaina. Momentuz 146 lagunek sinatu dute eskaera, baina ez dute esaten zer egingo duten jasotako sinadurekin.
Badaezpada, ekimena osatze aldera, Total la parte en euskera no la lee nadie blogetik manifestua EITBra bidaltzea proposatu dute, horretarako bi bide emanez:
- E-postaz: info@eitb.com
- EITBren kontaktu formulariotik
Sinadurak jasotzeko erabili duten testua ekarri dugu hona:
Euskaldunak Euskaraz ETBn
Hainbat erakunde ofizialetan euskaraz hizketan datorrenari erdaraz egin dezan eskatzea aspaldi debekaturik dagoen arren, egoera hori egunero ematen da oraindik non eta Euskal Telebistan. Elkarrizketak, adierazpenak,e.a. euskaraz eta erdaraz bietan egitea ohitura zaharra da Euskal Telebistan. Zoritxarreko praxi horren ondorioz, euskara ikus ezin bihurtzen da euskaraz bizi ez diren herritarrentzat, eta euskaltzaletasuna ikus ezin bihurtzen da herritar guztientzat.
Euskaraz nahiz erdaraz berdin hitz egin ahal izatea gauza ederra da. Baina bietan berdin hitz egin ahal izateak ez du esan berdin zaigula batan ala bestean jardutea. Ez luke hala behar behinik behin, zeren egunen batean herri honetako elebidunei berdin bazaigu euskaraz ala erdaraz egitea, euskara galbidean dela esan ahal izango dugu.
Euskaldunak Euskal Telebistan erdaraz hizketan agertzeak ondorio kaltegarriak ditu euskararentzat. Adornuko hizkuntza bihurtzen du, euskaraz esandako guztia gero erdaraz errepikatzen delako. Zalapartarik gabeko euskaltzaletasun naturala estali eta ezkutatu egiten du.
Eredugarri gerta daitezkeen pertsonak behin eta berriz adierazpenak euskaraz egiten ikusteak (erdal kanalean azpitituluz osaturik) euskaltzaletasuna ereiten du ikusleen bihotzean emeki eta etengabe. Euskara hobesteko mezu subliminala dakar. Pertsona horrek euskararen aldeko hautu pertsonala egin duela erakusten du apalki eta zalapartarik gabe. Gaur egun eskaintzen zaigun euskara eta erdararen arteko berdintasun axolagabea berriz, euskararen galgarria gertatzen ari da, gure gizartean gero eta maizago ikus dezakegunez.
Azpian sinatzen dugunok, Euskal Telebistako agintari eta langileei eskatu nahi diegu aspaldiko praxia aldatu eta ez eskatzeko euskaldunei erdaraz egin dezaten. Ezer eskatzekotan, euskaraz egin dezaten eska diezaietela.
Euskal Telebista euskararen mesedetan lan egiteko sortu zen, baina helburu horri beste batzuk nagusitu zaizkiola bistan da. Dena den, gainerako eztabaida gaiak oraingoz bazter utzi eta adostasunik zabalena iristearren azpian sinatzen dugunok, Euskal Telebistako agintari eta langileei eskatu nahi diegu aspaldiko praxia aldatu eta ez eskatzeko euskaldunei erdaraz egin dezaten. Ezer eskatzekotan, ETB zertarako sortu zen une batez oroituz, euskaraz egin dezaten eska diezaietela.
Erantzunak
Guztion begitan dago manifestuan eskatzen dena oso zentzuzkoa dela baina gogoeta bat egin dezakegu ere, erdal hiztunei ez zaie eskatzen ETB1erako euskaraz egitea. Beraz EITBk pertsonak diskriminatzen ditu, Euskal hiztunak espainola edo frantsesa jakin behar du baina ez alderantziz.
Nor da EITB erabakitzeko euskal hiztunoi presionatzeko, zeren eskatzea baino presionatzen zaituzte, erdaraz hitz egitera? Behartu ditzatela besteak euskaraz egitera.
Beraz manifestua borobildu zitekeen beste gauza bat gehituz; Hizkuntza ofizial bietan hitz egitea eskatu behar badute elkarrizketa bat egiterakoan ETB2 eta ETB1ean egiten diren emisioei egokitzeko erdal eledunei egitea dute eskaera, euskaraz egin dezatela ETB1ean irten behar direnerako
Legearen eta ondorioz legeak ezarri dituen boteren aurrean denok berdinak bagara izan gaitezen, baina benetan.
Legebiltzarrean euskaldunek euskaraz eginda ere zerbait aurreratuko genuelakoan nago... Niri, behintzat, lotza, pena, amorrua eta beste sentsazio negatibo ugari eragiten dizkit Aintzane Ezenarro, Arnaldo Otegi, Iñigo Urkullu eta abar espainieraz aditzeak...
Telebistari dagokionez, niri gertatu izan zait (Jaiak programan, duela urte batzuk) elkarrizketa egitera etorri eta euskaraz bakarrik erantzungo nuela esatean orduan elkarrizketa egitea nahiago ez dutela erantzutea ETBko langileek. Eta Ortuzar ari zen pululatzen garai hartan...
Niri lotsagarria iruditu zitzaidan gauza bat lehengo urtean gertatu zen ETBn. "El conquistador del fin del mundo" saioan, lehiakide bati (Koldo), internet bidez familiarekin hitz egiteko aukera eman zioten, proba bat irabazi ondotik. Kameren aurrean behintzat, emaztearekin eta haurrekin gaztelaniaz egitera behartu zuten eta irudietan ikusten zenagatik, ez bera, ez bere senideak ez zeuden batere eroso, egoera ez baitzen naturala, batez ere seme alabentzat.
Gainera, zergatik erantzun behar diogu bi aldiz galdera berari? Euskaraz erantzun eta jar ditzatela azpitituluak!!! (Lapurdi, Nafarroa Beherea nahiz Zuberoako euskaldunen hitzak jasotzean, horixe egin behar izaten dute ETB2-n)
Nahasterik gerta ez dadin, Tolosaldeko Euskararen Semaforoak argitu nahi du ez dela sinadura bilketaren antolatzailea. Guk ekimen horren berri eman baino ez dugu egin, eta, jakina, han eta hemen sinatzera bultzatu nahi dugu.
Guk Argia.cometik jakin genuen ekimen hau abian jarrita zegoela.
Orain ostiral goiza da, 10:15ak, eta 953 sinadura daude. Ziztu bizian doa!
Tolosaldeko Euskararen Semaforoa
/cache/Udako-Ola-2024_1_small_content.jpeg)
Prentsa oharrak egitea tokatzen zaigunon kasura ere zabaldu beharko genuke jarrera hori; sormen lan guztia euskaraz egiten dugunok, gure burua itzuli beharra izaten dugu kazetaritzan ari direnen ehuneko handi bat elebakarra delako, gazteleraz bakarrik, jakina.
Eskaria zentzuzkoa iruditzen zait, batez ere, gazteleraz aritzeko ohitura ez dutenei egin dezatela eskatzen dieten bihotz gabeek jokabidez jabetu gaitezen.