Internet, bidaiak eta sare sozialak

Elkarrek Tokitan.tv-ri buruzko aurkezpena prestatzeko propopsatu zidanean, pentsatu nuen ez zuela izan behar web telebista eta ekoiztetxe honi buruzkoa soilik. Internet eta bidaien inguruko hitzaldia behar zuen izan, derrigor, eta akaso baita Tokitan.tv-ren aurkezpentxo bat ere. Prestatu dudan aurkezpenak "Bidaiak, Internet eta sare sozialak" du izenburu.

Bertan hainbat alderdi jorratuko ditut. Batetik, Internetek bidaien eta turismoaren sektoreari nola eragin dion aztertuko dut. Bestalde, Internet bidaiatzeko nola baliatu daitekeen ere azalduko dut. Adibide praktikoak izango ditut hizpide, baita zein tresna erabil daitezkeen ere. Hiru ardatz nagusi izango ditu atal honek: Internet bidaiak prestatzeko nola erabil daitekeen azaltzen saiatuko naiz, baita bidaian gauden bitartean komunikatzeko eta informatzeko, eta bidaiatu ostean leku horiek berriz ere birtualki bisitatzeko nahiz geure bidaiaren berri emateko ere.

Bidaien inguruko beste blog eta bideoblog batzuk ere izango ditut aipagai, baita bidaiatzeko erabilgarriak diren zenbait tresna eta bitxikeria ere. Azkenik, Tokitan.tv-ri buruzko azalpena egingo dut. Entretenimendurako ikusentzunezko produktuaren nondik norakoak izango ditut hizpide, baitatransmedia ekoiztetxe gisa egiten dugun lana ere.

Hitzaldiak dirauen bitartean hainbat azalpen bideo proiektatuko dira, baita Tokitan.tv web telebistako zenbait kapitulu ere. Horien artean, oraindik emititu gabe dauden atalak izango dira ikusgai primizia gisa! ;)

Hitzaldian erabiliko dudan aurkezpena txertatu dut hemen, inork interesik izango balu aldez aurretik irakurri ahal izateko. Baina bertatik bertara ikusi eta entzun nahi baduzue, hemen azpian daukazue egutegia.

• Urriak 14: Donostia, 19:00etan Fermin Kalbeton kaleko 21.ean.
• Urriak 19: Bilbo, 19:00etan Poza Lizentziatua kaleko 14.ean.
• Urriak 21: Baiona, 19:00etan Arsenal Plazan.
• Urriak 26: Gasteiz, 19:00etan San Prudentzio kaleko 7.ean.
• Urriak 28: Iruñea, 19:00etan Comedias kaleko 14.ean.