Itzuli orri nagusira Bidali hau

Kazetaritza ikasketek utzitako ajeak

© cc-by-sa  Goio Arana ¦ 2010-06-14 ¦ 11:32 ¦ irakaskuntza

Bete berri dut aspaldiko gogo bat: Kazetaritza ikasketak egitea. Lau urtean Leioara joan-etorrian ibili eta gero, azkenean, bukatu ditut ikasketak. Goi mailako edozein ikasketak, logikoa denez, norberaren baitan uzten ditu arrasto garrantzitsuenak, bertan geratzen direlako ikasitakoak eta bizi izandako esperientziak. Hala ere, inguruko gauza arruntenetan ere aurki daitezke egindako ibilbidearen zantzuak. Hona hemen aztarna horien bilduma txikia.


Argazkiak.org | Boligrafoak © cc-by-sa: goioarana

Publizitatea

BOLIGRAFO HUTSAK

Boligrafo huts mordoa pilatu ditut egongelako tiraderan. Ikustekoa da zenbat ordu eman behar izaten den Kazetaritzako fakultatean oharrak hartzen eta zirriborroak egiten! Zehatzagoa izango naiz, lizentziaturaren ziurtagiria jaso aurretik, idazten eman behar izan dut BIC markako hamar boligrafo goitik behera hustutzeko besteko denbora. Goiko irudian ikus dezakezue, garbi-garbi utzi dudan boligrafo sorta.


Argazkiak.org | Teklak © cc-by-sa: goioarana

TEKLA GASTATUAK

Baina, jakina, bolaluma baino gehiago, egun, ordenagailua erabiltzen da Kazetaritzako fakultatean. Jarraitu aurretik, ohar bat Kazetaritza ikasten hasteko asmoa dutenei: prest egon behar duzue "galdutzat" emateko teklatuaren zenbait hizki. Ikusi argazkian nire eramangarriaren teklatu koitadua, lau urte egin eta gero, guztiz minuztuta geratu dira "A","R", "N" eta "E" hizkien teklak! Izan ere, sarean sartzeko erabiltzailearen izen-abizenak direla edo egindako idazlanetan jarri beharreko sinadura dela, kontaezinak izan dira, esate baterako, "Arana" idatzi behar izan ditudan aldiak! Jo eta sua teklei eta, bistan denez, bereziki "A", "R", "N" eta "E"ri! Zalantza azken horrekin sortu zait: zer dela eta hondatu dut hainbeste "E" gaixo hori?

TXISKEROAK BETETA

Pendrive bi eta disko gogorrean nahikotxo toki behar izan dut bildutako idazlan eta apunte guztiak gordetzeko. Lau ikasturteren buruan 8,93 Gigakoa izateraino hazi da EHU izeneko karpeta. Gordeta ditudan dokumentuen artean daude, batez ere, testu eta pdf formatuko dokumentuak, baina tartean aurkezpenak eta argazki ugari daude, baita bideo txiki gutxi batzuk eta podcast bat edo beste ere.

MEZU ELEKTRONIKO ASKO

Posta elektronikoa ere asko erabili izan dut. Horren gainean baieztapen bat: ezinbestekoa da ganorazko posta zerbitzua aukeratzea, eta ez unibertsitateak berak eskaintzen duena. Mezuak antolatzeko asmoz, "Kazetaritza" etiketa erabiltzen hasi nintzenetik Gmail-eko postontzian 677 mezu gorde ditut tag horrekin.


Argazkiak.org | Betaurrekoak © cc-by-sa: goioarana

DIOPTRIAK, GORA

Kazetaritza ikasketak ala Santa Luziaren madarikazioa? Berriro ikasten hastea erabaki nuenean ez nuen, inondik inora, betaurrekoen premiarik. Orain, aldiz, hizkiak dantzan darabilzkit begi aurrean. Betaurreko txiki horietako batzuk jantzita egin behar izan ditut azken urteko azterketak! Gauza asko irabazi dut Kazetaritza ikasita, tartean, dioptriak.

GASOLINA UGARI

Ikasketek utzi duten azken arrastoa C02 izan da. Sinesgaitza eta lotsagarria da, baina Debagoiena osotik ez dago inolako garraio publikorik unibertsitate publikora joan ahal izateko. Autobus bat bere ere ez, zero! Ez daukat esaterik lau urteotako joan-etorrietan zenbat gasolina erre dudan, baina, duda barik, asko izan da, larregi.

Erantzunak

#1. Re: Kazetaritza ikasketek utzitako ajeak

Joxe Rojas ¦ 2010-06-14 ¦ 11:52

Zorionak, Goio!

Ondo hartu nota eta ea hemendik 15 urtera arrasto horietatik zenbat geratzen zaizkizun. Nire kasuan karrerak utzitako 'souvenir' gogokena hauxe da:

 

Bueno, horren berdin-berdina den beste tipometro bat, argazkia Luistxori hartu diot-eta. Nola pasatzen den denbora!!!

#2. Re: Kazetaritza ikasketek utzitako ajeak

Luistxo ¦ 2010-06-14 ¦ 12:17

Zorionak Goio (esan beharko, ezta?). Artikulu polita, eta argazkiak ere bai.

Aztarna arkeologiko horiek baliorik ote duten ez dakit, baina neure tipometroak oso erabilpen praktikoa du gaur egun ere: paper batetik zati bat mozteko gauzarik praktikoena da, adibidez iragarki bat mozteko egunkari orri batean.

#3. Re: Kazetaritza ikasketek utzitako ajeak

Mikel A. ¦ 2010-06-14 ¦ 12:18

'E' letraren misterioaren argitan:
http://www.zientzia.net/informazioa/elhuyar/2005/205/pdf/A205_O40-43.pdf

'E' omen da euskaraz 2. hizki erabiliena eta gertuko erdaretan (gaztelanian, frantsesa eta ingelesa) erabiliena.

#4. BICak eta miopia

Mikel Larreategi ¦ 2010-06-14 ¦ 13:25

Ez dut gaur arte BIC bat osorik gastatu duen pertsonarik ezagutu, eta gaur... toma !!! 10 gastatu dituen bat ezagutu dut !!!

Miopiarena ere komentatu izan dut, "Unibertsitateak miopia sortzen du", inork ez zidan sinisten... AEBtan egiten duten moduan, aurkeztuko dugu demanda kolektibo bat EHUren aurka?

Zorionak!

#5. Re: Kazetaritza ikasketek utzitako ajeak

ana ¦ 2010-06-14 ¦ 13:27

eta ze sentsazio geratu zaizu behin kazetaritza ikasketak amaituta?
Lizentziatua izanda, lan bat bilatzeko aukera izango dituzu orain?
akaso EITB taldean sartu ahal izango zara kazetaritza ikasita?

Agurtzane Elorduik eitb-ehu masterraren inguruan idatzitakoa irakurri ostean burura etorri zitzaidan gogoeta da...
Kazetaritza 4 urtez, Leioara joan, lanak egin, ordenagailua gora eta behera... eta horren ostean,zer? Master bat derrigor egin beharra?
Zergatik ez dute Mikel Reparaz bezalako kazetari bat inoiz gonbidatu karrera egin bitartean eta bai aldiz master horren modulu bat emateko?
Zergatik Gorka Palaciosek kazetaritza mulimediaren inguruko klaseak emango ditu unibertsitatean ezer gutxi irakasten duenean?

Pena da lau urte fakultatean eman ostean , orain mastereko kreditu eta arloak ikusi eta lau urte horietan faltan bota dugun guztia hor dagoela ikustea... pena batez ere kontutan hartuta guztiek ez dugula dirurik masterra egiteko... eta ez masterra egiteko bakarrik... lan egin gabe egoteko masterrak iraun bitartean.

#6. Re: Kazetaritza ikasketek utzitako ajeak

Iker Gurrutxaga ¦ 2010-06-14 ¦ 13:39

Zorionak Goio!

Ni ere bukatzeko desiratzen nago. Kazetaritza ikasten eraman ditudan urte hauetan, nire kasuan, hiru ordenagailu behar izan ditudala aipatu.

Lehena, lapurtu egin zidaten. Guggenheimen kazetaritza ikasleok konferentzia bat izan ostean, Abandoibarrako pasealekuan inor ohartu ez zela. Bigarrena astero-asteroko autobus bidaien ondorioz apurtu zen, eta orain hirugarrenarekin nabil.

Beraz, ikasketak berak baino garestiago irten zait ikasteko oinarrizko materiala! Ea nik ere zuk bezalaxe hil honetan bertan amaitzen ditudan Kazetaritza ikasketak!

#7. Re: Kazetaritza ikasketek utzitako ajeak

Iker Gurrutxaga ¦ 2010-06-14 ¦ 13:47

#5 esan beharra daukat arrazoi duzula esaten dituzun gauza batzuetan baina beste batzuetan ez nator zurekin bat.

Egia da gure ikasketak ez direla munduko onenak izan - orain Boloniako planarekin izugarri aldatzen da, eta badirudi, ikasketa plana askoz egokiagoa dela-, baita profesionalen mintegirik ez zaigula eskaini kasik.

Baina Txema Ramirez de la Piscinak antolatutako hitzaldietan etorri dira Imanol Murua bezalako profesionalak, Jotxo Larraņagarekin, Julian Beloki bezalako pertsonaia bat izan dut nik behintzat nire klasean, Garikoitz Udabek zuzeneko saioak egin ditu... Hortaz, alde horretatik ezin kexatu.

Eta Gorka Palaziorena... zer nahi duzu ba esatea! Klasean agian ez zuela gehiegi irakatsi? Mailaren arabera eman behar zuen klasea eta hori ez da erraza izaten, baina tutoretzaren batera edo bulegoan dagoen edozein unetan, gustu handiz irakasten du berak dakien edozer gauza. Esperientziaz diotsut.

Hortaz, ikasketa plana eskasa zenarekin ados, baina beste gauza batzuekin ez hainbeste.

#8. Re: Kazetaritza ikasketek utzitako ajeak

Garbiņe ¦ 2010-06-18 ¦ 13:46

Ba ni 5.arekin guztiz bat nator. Kontaezinak dira, kazetaritza karreran, multimediak kazetaritzan egun duen garrantziaz hitz egin diguten aldiak. Baina karrera amaituta arlo horrenta 'umezurtz' nengoen!!! Masterra egin behar!
Eta masterrean eman didatena ez dut nik karreran aurkitu.
Espero dezagun, 7ak dioen bezala, Boloniako planarekin "gauzak izugarri aldatzea", beharra badago eta.
Eta profesionalekin eta lan munduko errealitatearekin hartu emana estutzeaz gain, "Egin ditzagun titular akojonanteak", "Informazio piezen inguruko teoria landu bai, baina batez ere praktikatu egingo dugu" , "Komunikabide ezberdinei egokitutako moduan lan egin", edota "Beharrezkoak izango ditugun baliabide guztiak ezagutu" bezalako ikasgaiak egotea izugarria litzateke, ez?!

#9. Re: Kazetaritza ikasketek utzitako ajeak

Iņigo ¦ 2010-06-18 ¦ 19:45

Boligrafoak gero eta gutxiago erabaili arren, ikerketa soziologiko ona izan daiteke hutsitutako boligrafoen konparaketa...

Zenbat halako gastatu beharko dira Zuzenbidea ikasgaiak egiteko, eta Medikuntza? segurutik gehiago!

Erantzun (klik zabaltzeko)

Publizitatea

 Nabigatu euskaraz