Interneteko albistegia

Gonak gizonezkoentzako

© cc-by-sa Elena Laka ¦ 2010-03-24 ¦ 09:47 ¦ zer-erantzi

Aste honetan moda blogosferako ikur puntakoa den The Sartorialistek gizonak gonarekin jantzita atera ditu. Oso eder, gainera. Jende dotorea eta moda-modakoari argazkiak ateratzen ibiltzen den blogari honek, gizon gonadunen gaia plazaratu nahi izan du. Gertu al gaude gizon gonadunak ikusteko?

Kilt batekin Seattlen: © cc-by-nd: Jen Morgan Moriarty

Publizitatea

Gona gutxi ikusi dizkiegu gizonei orain arte. Nik gogoan dauzkadanak, oso bazterreko adibideak: apaiz sotanadunak eta Arantzazuko fraileen abituak, (bi jantziok desagertzeko zorian), eta Oñatiko korpus dantzariak. Hutsa eguneroko jantzietan. Hori Euskal Herrian. Eta hemendik kanpora, eskoziarreez gain, ba Miguel Bose, “Amante bandido” kantatzen zuen garaian, gona plisatu harekin , eta oraintsuago, Marc Jacobs disenatzailea, saiatu dena gizonentzako gona modan jartzen. Gona antzeko beste adibide bat, udan mutil ausarten batek pareoa gona moduan jantzita erabiltzen duenean hondartzako joan-etorria egiteko, ondo guapo eta eroso. Baina Euskal Herrian oso bakarren bat, gehiago Meditarraneoko uharteetan.

Ostera, adin guztietako emakumeok gonak zein prakak janzten ditugu gaur egun. Prakak lorpen sozial bat izan ziren, Coco Chanel eta Munduko Bigarren Gerrateari esker zabaldu zirenak, hasieran iraultzaile izan baziren ere, gaur egun inor gutxi gogoratzen da hortaz. Gonak ere gure izaten segitzen du, eta hain beste eraldaketa jaso ditu, gaur egunean ezin dela oro har gonaz berba egin, gona motaz baizik: minigona, gona plisatua, A formako gona, arkatz gona, maxigona, gona tuboa, gona tulipa, gona globoa...

Gizonezko bat gonarekin eTech konferentzia batean.
© cc-by: James Duncan Davidson, Etech, O'Reilly Media

Azken hogeitamar urteotan moda asko zabaldu da gizonentzako, koloretan (gogoratzen gizonek arropa berde pistatxo edo arrosa eramatea gaizki ikusita zegoenean?), diseinuetan (praken formari erreparatzea besterik ez dago)... Baina gona ez da sartu. Horrek mentalitate aldaketa handia behar du, antza.

Aurten, H&M arropa denda ezagunak, gizonentzat gonak jarri ditu salgai udaberri-udako katalogoan

Gertu daude gizonak gizontasunaren azkenengo mitoetako bat eraisteko? Ikusiko ditugu gizonak gonaz jantzita?

Erantzunak

#1. Re: Gonak gizonezkoentzako

ameslaria ¦ 2010-03-24 ¦ 10:52

ikusi dira ya, ez? hori esan didate niri behintzat...

#2. Re: Gonak gizonezkoentzako

Sustatu ¦ 2010-03-24 ¦ 11:27

Sarrerarekin zetorren irudia (gero errepikatua), aldatu dugu, irudi libreen artean gona bilatu barik, kilt bilatuta. Gizonezkoen gona eskoziarra da, kilt-a. Hona beste bat, bulegari batek jantzia:

Goiko Seattlekoa ere Kilt bat da, koadroazkoa izan ez arren. Eta mutikotxo bat ere bai, kilt-arekin.

Azpian, irudi libre gehiago, Elenak aipaturikoak ilustratzeko:

Corpus eguna Oñatin: Creative Commons Aitortu Partekatu © cc-by-sa: Dantzan.com

Abadeak pilotan Arraten, 1954an: Creative Commons Aitortu Partekatu © cc-by-sa: Indalezio Ojanguren, GureGipuzkoa

#3. Re: Gonak gizonezkoentzako

Oier Araolaza ¦ 2010-03-24 ¦ 11:29

Tradizioan nahiko zabaldua egon da gona mutilen artean. Oñatikoari "saya valenciana" deitzen zaio, eta hain zuzen ere Levante aldekoak dira Todolellako hauek:

Arabako Errioxan, Villabuena, Guardia edo Eltziegon (orain neskak) mutilek gonak jantzi ohi dituzte dantzarako.

Azken aldian abiatu diren zenbait tradiziotan ere ageri zaigu gona. Adibidez Iruñean eta Arraten. Horra Iruñeko ezpata-dantzako argazki bat:

Nazioartean Eskoziakoa da akaso burura lehen etortzen zaiguna, baina piskat pentsatuta mordoska bat daudela konturatzen gara. Adibidez, Athenas-en, parlamentu aurrean guardia aldaketa egiten dutenek gona janzten dute, izan ere Grezian jantzi tradizionalek maiz dute gona gizonezkoentzat:

Europan barrena, oso jantzi arrunta da gizonezkoentzat gona: Rumania, Mazedonia, Hungaria, Bulgaria,... Eta munduan barrena ere bai, hainbat adibide aurki daitezke.

#4. Re: Gonak gizonezkoentzako

Luistxo Fernandez ¦ 2010-03-24 ¦ 11:33

Sartorialist-eko hiru eredu bikainen artean ere esango nuke bigarrena kilt bat dela, koadrozkoa bai behintzat. Neure ikuspegi beharbada hertsi eta aurreiritzizkoan, Sartorialisteko beste bi gona-gonak baino maskulinoagoa ikusten dut. Kilt bat gauza dotorea iruditzen zait... Hala ere, uste dut ni ez nintzatekeela ausartuko. Eta beste gona-gonak, are gutxiago.

#5. Re: Gonak gizonezkoentzako

Iñaki Olano ¦ 2010-03-24 ¦ 14:12

Zergatik konformatu gona edo sotanarekin?
Argazkiak.org | Cañizares.en magna capa prekontziliarra © cc-by-sa: axiomaxio Duela 3 urte Toledon Cañizares artzapezpikuak tradizioari honela eusten zion, 5 metroko "magna-capa".rekin.. Bodorrio "vip"etako kaparik deigarrienak eklipsatuz. Osea, ez direla mojak Jaungoikoarekin ezkontzen diren bakarrak. Gorri-pasioz gainera.