Interneteko albistegia

Eibarren El Corte Ingles handi bat ireki dute gaur

© cc-by-sa Sustatu ¦ 2009-11-26 ¦ 13:16 ¦ enpresa

Garai batean Alfa josteko makinen lantegiak okupatzen zuen lekuan, zenbait solairutako merkatalgune handi bat inauguratu dute gaur Eibarren: El Corte Ingles.

Argazkiak.org | El Corte Inglés (Eibar, Gipuzkoa) © cc-by-sa: asarasua

Publizitatea

Eibartarrak posta-zerrendan dexenteko jarduna egon da kontu honen inguruan, hari batean baino gehiagotan. Batzuen ustez, ona izango da herriko bizitzarentzat eta jarduera ekonomiko orokorrarentzat; beste batzuen ustez, herriko dendarien jarduna kaltetuko du, eta horrek ondorio txarrak izango ditu.

Eibarko herriaren fisonomia eta erdigunea ere aldatzen du nolabait proiektuak. Ego errekaren parte bat agerira etorri da berriro, adibidez, urteak estalita egon ondoren.

Gipuzkoan zehar dexenteko propaganda egin du El Corte Inglesek, euskaraz zein gaztelaniaz. Webgunean informazio apur bat badago euskaraz. Hona telebistarako iragarki bat:

Bizkaiko inguru batzuetan ere, Durangalderaino edo, egin izan dute propaganda.

Erantzunak

#1. Re: Eibarren El Corte Ingles handi bat ireki dute gaur

Josu Mendicute ¦ 2009-11-26 ¦ 14:03

Bi argazki hauetan ikusten da inguruaren eraldaketa eraikinaren eraginez. Hemen Alfa eraisi zutenekoa:

Jatorrizkoa: Armagintza Eskola Alfaren gainean Creative Commons Aitortu © cc-by: Gari Araolaza

Eta hemen orain, merkatalgunea eginda, artikuluan kargatutakoaren antzekoa... eta Markeskua Jauregia atzean duela.

Jatorrizkoa: El Corte Ingles (Eibar, Gipuzkoa) Creative Commons Aitortu Partekatu © cc-by-sa: Asier Sarasua

Inguru guzti hori Alfa enpresak bete izan zuen. Hemen ikusten da 1953. urtean orain El Corte Ingles dagoen tokian eraiki zuten fabrikaren zatia:

Herri-administrazioen lanak, ohar legala hautsiz ekarria: Egoibarra

Ez dut esango El Corte Ingles txarra denik Eibarko ekonomiarentzat, baina bai bere etorrera eta etxe batzuk egiteko Eibarko herriak ondare bat galdu duela, altxor bat, bere arimaren adierazgarri handi bat.

#2. Re: Eibarren El Corte Ingles handi bat ireki dute gaur

Amonamantangorri ¦ 2009-11-26 ¦ 14:22

El Corte Inglés txarra izanen da Eibarko ekonomiarentzat, dudarik gabe. Iruñean badugu bat, eta behintzat esan dezaket ez dela ona izan ez inguruko saltokientzat eta ezta El Corte Ingles bereko langileentzat ere. Ez dute sindikaturik, langileek sekta batean bezala jokatu behar dute. Beldurgarria da.

#3. Re: Eibarren El Corte Ingles handi bat ireki dute gaur

Unai ¦ 2009-11-26 ¦ 14:31

Ba Iruñean ez dakit, baina Gasteizen El Corte Inglési esker erdigunea ez dago hilda.

Gero eta merkatal-gune gehiago zabaltzen dituzte hirien kanpoaldean, eta Corte-a gutxienez erdigunean dago.

pd: Eibarren lehen ez zegoen El Cortes Inglés bat?

#4. Eibarren, Galerias; Corte Inglesak erosia

Luistxo Fernandez ¦ 2009-11-26 ¦ 14:49

Bai, Eibarren badago beste korteingles bat Toribio Etxeberria kalean. Espainian almazenen bi sare handi zeuden garaian, Galerias Preciadosek ireki zuen hori Eibarren, Francoren denboretan. Gero El Corte Inglesek erosi zuen Galerias sarea, eta zentro guztiei izena aldatu zitzaien.

Herrian oraindik denda handi (baina berriaren aldean txiki) horren sabaian dagoen plazari, Galeriasko parkea esaten zaio.

#5. Re: Eibarren El Corte Ingles handi bat ireki dute gaur

Josu Mendicute ¦ 2009-11-26 ¦ 15:10

Galeriaseko parkea Plaza Berria zen lehen, eta Eibarko Bizikletaren Plaza da orain, baina gazteon jergan Galeros ere deitu izan diogu plaza horri. Plazaren azpian dago lehendik zegoen Corteinglesa, Toribio Etxebarria kalean.

Toribio Etxebarria kalea ere, Eibarren ezagunagoa agian Dosdemayo izen zaharrarekin... baina kanpotar askorentzat "El Corte Inglesaren kalea" da.

#6. Re: Eibarren El Corte Ingles handi bat ireki dute gaur

Norbait ¦ 2009-11-26 ¦ 16:09

Bezerorik ez badu Corte Inglesek, itxi egingo dute eta ez du Eibar kaltetuko. Haatik, jendea hara baldinbadoa, denak pozpozik bezero eta nagusi.

#7. Re: Eibarren El Corte Ingles handi bat ireki dute gaur

GipuzkoaKultura ¦ 2009-11-27 ¦ 00:50

Josuk Egoibarra webgunetik Sustatura ekarritako argazki zaharraren eskubialdean agertzen den hiru solairuetako baserri puska Isasi-Barrenengua da. Aidanez, berau ere 1956. urtean eraitsi egin zuten Alfa tailerra eraikitzeko. Etxeko bizilagunak azpikaldekoak ditugu:
Argazkiak.org | Isasi Barrenengua baserria, Eibar. © cc-by-sa: GipuzkoaKultura

#8. Plaza Berria Eibarren

Gari Araolaza ¦ 2009-11-27 ¦ 09:02

Agian ez zaio Sustatuko irakurlego orokorrari interesatuko, baina argitzeagatik:

Galeriaseko parkea ez da inoiz Plaza Berria izan, are gehiago ez du inoiz izen ofizialik izan Eibarko Bizikletaran Plaza izena jarri dioten arte. Izan ere, han ez da inoiz pegorarik egon.

Bestalde, Plaza Berria ere ez dago Eibarren. Plaza BArria da izena 1978an kaletegi berria egin zutenetik (Frankoren garaian Plaza de los Mártires izena izan zuen).

Toribiok kontatzen du (uste dut Viaje al País de los recuerdos liburuan), nola Plaza Barria asmakuntza bat izan zen. Elgetakale eta Txiriokale bukatu eta elizaren orma arteko zati horretan, egun batean garbiketa bat egin eta han sortu zen espazioari jarri ziotela Plaza Barrixa izena.

#9. Re: Eibarren El Corte Ingles handi bat ireki dute gaur

pabLOL ¦ 2009-11-27 ¦ 13:38

Gari Araolazak dioenari jarraituz:

Ez dakit ofiziala zan edo ez, baina nik txikitan gogoratzen dot Galeriasko parkian (elizako fatxadan) kalien izenak eukitzen ditxuen plaka bat zeuala, ta bertan "Plaza Berria" edo "Plaza Barria" jartzen zeban. Oin dala zenbat? Ez dakit, baina uste dot horko itxurrixa (harrizko bola hori itxurri bat zan) martxan zeuala, asike atara kontuak...

Erantzun (klik zabaltzeko)