Interneteko albistegia

Txandala eta takoidun zapatak

© cc-by-sa leire narbaiza ¦ 2009-11-04 ¦ 07:20 ¦ zer-erantzi

Txandala eta takoiak ez dira justu gehien janzten ditudan arropak, ez elkarrekin, ez banatuta. Jende askori gustatzen zaio eroso egoteko txandala janztea, etxean, bidaiaren bat egiteko... niri neuri, ostera, kirola egiteko ez bada ez dut gustura erabiltzen. Eta takoien gainean, zer esan? Post oso bat daukat! Ez takorik ez txandalik erabili ez arren asko esan nezake arropa bi hauetaz. Hain zuzen ere oso gogoko ez ditudalako.

Publizitatea

Txandala eta takoidun zapaten konbinazioa hortera izatearen sinboloa da, edo gustu txarrarena. Egia esateko, pieza bi hauek ez dira ondo ezkontzen eta denok daukagu buruan aireportuan folklorikaren bat horrela jantzita; esate baterako, Rocio Jurado aireportuan, nonbaitetik iritsi berri, bere txandal arrosarekin, soldadore betaurrekoak (Pantoja estilokoak), takoi altuak, eta neguan.......Txatatatxan! Larruzko berokia! Kitsch aberatsen horteretan horterena!

Baina nork ez du inoiz tentaziorik izan gutxien pegatzen duten janzkiak elkarrekin erabiltzeko? Nik askotan. Loradun alkandora koadrodun prakekin, gona berde kakia niki berde perikoarekin, udako txankletak neguko belusezko prakekin, panazko jaka lihozko praka arinekin, neguko txamarra tirantedun nikiarekin, merkadilloko kotoizko kamiseta merkea markako praka garestienekin, jertse laburra alkandora luzearekin...

Batzuetan ez gara ausartzen, baina batzuk atrebitu, eta tendentzia sortu dute; ez da hori gertatu, bada, gona eta prakak batera janzten zutenekin? Lehen Horreur! zena orain denok jantzita! Nork agintzen du horretan? Zergatik ez dira kolore batzuk besteekin ondo gelditzen? Gure aitak esaten zuen moduan, nork dio koadrodun alkandora ezin dela marradun prakekin jantzi, e?

txandalatakoi.jpg 96KB (98412 byte)

Erantzunak

#1. Ternua prakak & Columbia botak

arrikitaun ¦ 2009-11-04 ¦ 17:57

Jo, behin Mexikoko lagun batek hauxe bota zidan:
bera- Eta zuok euskaldunok mendiko arropa behar duzue tabernetara joateko?
neu- ...
Guretzat ohikoa dena agian ez da oso-oso normala beste leku batzuetan. Igual beste horientzat Jenny, Vanessa, Kevin eta Jonathan batzuk gara eta gu oraindino konturatu gabe.

#2. Re: Txandala eta takoidun zapatak

Desplazatua ¦ 2009-12-14 ¦ 21:53

Martiriok bazuen abesti bat: "con mi chandal y mi taconé, arreglá pero informar":http://sindrogamico.blogspot.com/2009/04/con-mi-chandal-y-mis-tacones-arregla.html

Ta, gernikan mutilek diñuen bermion andrak domeketan txandalian, eta dotore-dotore urtetzen diela ogi bila.