Itzuli orri nagusira Bidali hau Tweet

40.000 artikulutara iritsi da euskarazko Wikipedia

© cc-by-sa  Sustatu ¦ 2009-07-16 ¦ 08:19 ¦ internet

Euskal hiztun kopuruari begira, albiste ona. Interneten euskaraz dagoen entziklopedia handiena eta osatuena da Wikipedia. Proiektu askea, edozeinek artikuluak idatzi eta aldatzeko aukera ematen duena.

Munduko 266 hizkuntzatik, 46.a

Munduko hizkuntza gehienetan dago gaur egun, 266 hizkuntza guztira, eta euskara 7 mailatik 2.ean ageri da, 46. postuan.

• 100.000 artikulutik gorakoak (27 hizkuntza)
• 10.000 artikulutik gorakoak (62 hizkuntza)
• 1.000 artikulutik gorakoak (182 hizkuntza)
• 100 artikulutik gorakoak (65 hizkuntza)
• 10 artikulutik gorakoak (21 hizkuntza)
• Artikulu 1etik gorakoak (5 hizkuntza)
• Artikulurik gabeko 2 hizkuntza.

Aktibismoa

Euskarazko Wikipediak 10.000 erabiltzaile ditu. Bataz beste, erabiltzaile bakoitzeko 4 artikulu, hortaz. Euskal wikipedistak beste batzuk baino dexente aktiboagoak dira, eta eskertzekoa da beraz bere lana. Horra, beste hizkuntza batzuetan wikipedista bakoitzako artikulu kopurua:

• Espainiera: 0,4 artikulu
• Frantsesa: 1,3 artikulu
• Alemaniera: 1,2 artikulu
• Italiera: 1,4 artikulu
• Portugesa: 0,8 artikulu

Wikipedian parte hartzea librea da artikulu berriak sortuz, daudenak osatuz, proba orrian saioak eginez. Wikipedian berriak direnentzat laguntza ere badago.

Euskal Herria sendotu Interneten

Pasa den urtean merezitako Argia Saria jaso zuen euskarazko Wikipediak. Gogoratzeko modukoa, Wikipedia saritzeko arrazoia nola azaldu zuen Argiak:

Internet mailan munduan sortu den ekintzarik garrantzitsuenetako batean parte hartuz, euskara eta Euskal Herria sendotu ditu Interneten eta aldi berean munduan puntakoa den jarduera batekiko sinergiak eragin ditu euskaraz.

40000_euskal_wikipedia.png 12KB (12782 byte)

 Nabigatu euskaraz