Interneteko albistegia

Euskalgintzako hiru langile atxilotu dituzte, ETAkoak direlakoan

© cc-by-sa Sustatu ¦ 2009-06-23 ¦ 15:26 ¦ politika

Espainiako Poliziak hiru lagun atxilotu ditu gaur goizean Gipuzkoan, ETAkide izatea leporatuta. Patxi Uranga oriotarra, Olatz Lasagabaster usurbildarra eta Ainara Vazquez astigarragarra. Hirurak euskalgintzako ekimenetako langileak dira: Hik Hasi, Gaztezulo eta Bagerakoak. Baltasar Garzon epailea bertan zela erakunde hauen egoitzak miatu ditu poliziak gaur goizaldean.

Publizitatea

Patxi Uranga Gaztezulo aldizkariko kazetaria da eta Ainara Vazquez Bagera Donostiako Euskara Elkarteko administraria. Olatz Lasagabaster Hik Hasi hezkuntza ekimeneko langilea da, eta izen bereko aldizkarian egiten zuen lan gaur arte.

Patxi Uranga eta Olatz Lasagabaster haren bikotekidea, Usurbilgo Ugaldea industria guneko etxebizitza batean atxilotu dituzte bart. Berri agentzia batzuen arabera, 75 kilo lehergai aurkitu dituzte bertan. Atxilotutako bestea, Ainara Vazquez donostiarra da eta Astigarragan atxilotu dute.

Bi etxebizitza horiez gain, pertsona hauen lantokiak miatu dituzte.

Miaketak Bagera eta Hik Hasin

Bagera eta Gaztezulok elkarrekin dute egoitza Donostian, eta bertan Ainara Vazquez eta Patxi Urangaren ordenagailuak hartu ditu poliziak, ez besterik. Uranga kazetaria da Gaztezulon baina bere ordenagailua gabe, aldizkariak aurrera egiteko modua badu. Aldiz, Vazquezen ordenagailuan Gaztezulo aldizkariaren zein Bagera elkartearen kontularitza, agiri eta paperak zeuden, eta hauek gabe geratu dira une honetan. Miaketa hau Baltasar Garzon Entzutegi Nazionaleko epailea bertan zela egin da.

Hik Hasiren egoitzan (hau Donostiako Errekalde auzoan) ere izan da Garzon epailea eta han ere, Olatz Lasagabasterren lanpostua ukitu dute, ez besterik. Bere paperak eta ordenagailua eraman ditu poliziak. Hik Hasi aldizkaria erredaktatzen egiten zuen lan Lasagabasterrek.

Poliziak esan du hiru lagun hauek ETAkide legalak direla, atentatuak egiteko prest zeudela, baina oraindik ekintzarik ez dutela egin.

Informazio gehiago euskaraz Berrian eta EITBn.

Erantzunak

#1. Atxilotuei elkartasuna

Gaztezulo / Bagera ¦ 2009-06-23 ¦ 16:43

GAZTEZULO aldizkariko eta BAGERA Donostiako Euskaltzaleen Elkarteko langileen eta zuzendaritzen oharra komunikabideei eta euskal jendarteari:

Lehenik eta behin, Espainiako Poliziak atxilotutako Ainara Vazquez eta Patxi Uranga lankideei elkartasuna adierazi nahi diegu. Aldi berean, haien errugabetasun presuntzioa errespetatzea ere eskatzen dugu. Une honetan dugun informazio eskasaren arabera, komisarian inkomunikatuta daude biak. Horregatik, une oro haien eskubideak errespetatuak izan daitezela eskatzen dugu, horretarako, besteak beste, berehala inkomunikazio egoera hori bertan behera utzita.
Espainiako Poliziak GAZTEZULO eta BAGERAren egoitzatik eramandako bi ordenagailuak ere ahal bezain laster itzultzea nahi genuke, prentsan eta euskararen aldeko lanean aritzeko lan tresnak besterik ez baitira. Besterik gabe, agur bero bat.

#2. Re: Euskalgintzako hiru langile atxilotu dituzte, ETAkoak direlakoan

Hik HAsi aldizkaria ¦ 2009-06-23 ¦ 18:59

GURE KIDEARI ELKARTASUNA

HIK HASI Euskal Heziketarako Egitasmoko kideok komunikabideei eta euskal jendarteari adierazi nahi dioguna:

HIK HASI EUSKAL HEZIKETARAKO EGITASMOAren eguneroko lanarekin jendarteari Euskal Herriko hezkuntza arloan aurrera egiten lagundu nahi diogu. Horren lekuko dira, HIK HASI aldizkaria eta 14 urte hauetako bide luzean gauzatu ditugun hainbat ekarpen.

Olatz Lasagabaster ere azken bi urtetan egunero ari da bere ahalegina egiten gure ondoan. Guk bezala, sinesten du beste jendarte zuzenago eta bidezkoago bat eraikitzea lortuko badugu, hezkuntzan gogoz aritu beharra dagoela. Eta horretan dihardugu.
Gure herriko kultura eta hezkuntza garatzeko tinko aritzen da gurekin batera. Aldizkaria da bere tresna, gurea den bezala, horiek guztiak lau-haizetara zabaltzeko, jendarte hezituagoaren eta euskaldunagoaren alde borrokatzeko.
Horreraino Olatzi buruz esan dezakeguna. Hortik aurrera, jendarteko partaide guztiok dugun errugabetasun presuntzioa berari eta bere lagun diren Ainara Vázquezi eta Patxi Urangari errespetatzea eta epaileak deklarazioa hartu nahi badie, lehenbailehen haren aurrera eramanak izatea eskatzen dugu. Beste garai batzuetakoa beharko lukeen inkomunikazioaren iluntasuna utz dezatela bertan-behera, azkar baino lehen.
Benetako jendarte demokratikoan eta giza eskubideak errespetatzen direnean eskatu ere egin beharko ez liratekeen eskubideen galde berriz ere, tamalez.
Une gogor honetan gure animorik handiena eta elkartasunik beroena Olatzentzat, Ainararentzat eta Patxirentzat, eta haien etxekoentzat.
Lanean jarraituko dugu, guk dakiguna egiten zuek denok gure ondoan izan arte!

#3. Re: Euskalgintzako hiru langile atxilotu dituzte, ETAkoak direlakoan

Sustatu ¦ 2009-06-23 ¦ 19:18

Patxi Uranga atxilotuak, Gaztezulon baino lehenago, Orio eta Aiako Karkaran egiten zuen lan, eta Karkarak ere ohar bat kaleratu du.

#4. Irutxuloko Hitza eta Bizarrain elkartea

Sustatu ¦ 2009-06-24 ¦ 09:36

Irutxuloko Hitza egunkariko langile eta zuzendaritzak ere bat egin du bere eskaeran Bagera eta Gaztezulorekin. Hona agiria.

Donostiako Altza auzoko Bizarrain elkarteak ere oharra kaleratu du.

#5. Re: Euskalgintzako hiru langile atxilotu dituzte, ETAkoak direlakoan

iturrizar ¦ 2009-06-24 ¦ 10:01

ETArekin zerikusirik ez badute, primeran. Ia lehenbailehen askatzen dituzten.
Baina ETAn sartuta badaude, beraiek dira erantzule bakarrak ETA eta euskalgintza nahasteagatik, ez Garzon ezta beste inor ere.
Eta kasu honetan nire elkartasuna izan beharrean, nire kontrakotasuna izango dute.

#6. iturrizarri

zakarias ¦ 2009-06-24 ¦ 12:04

ETArekin zerikusirik ez badute, primeran. Ia lehenbailehen askatzen dituzten.
Baina ETAn sartuta badaude,

ez da nahikoa, edozein kasutan ez inkomunikatzea eta ez torturatzea eskatu behar da, eta epailearen aurrera lehenbailehen eramatea.

#7. Re: zakarias

iturrizar ¦ 2009-06-24 ¦ 14:23

Guztiz ados: Giza eskubide guztiak gizaki guztientzat.
Ez da beti esan behar, edo ez litzateke beti esan beharko.

Baina ni euskalgintza eta ETA nahasten dutenei buruz ari nintzen...

Erantzun (klik zabaltzeko)