Eszisioa gauzatu da EAn eta Alkarbide sortu da

Egia esan, hauxe da Alkarbide, duela urte dexentetik:

"Bizkaiko Lurralde Historikoko udal eta mankomunitateetako euskara zerbitzuen bilgunea.Bizkaiko Foru Aldundiak sortu du Alkarbide, Eusko Jaurlaritzarekin eta EUDELekin lankidetzan.

Alkarbideren xede nagusia, berriz, euskararen aldeko toki politikak bateratu eta bideratzea da, hala euskara sustatzeko irizpideak finkatzeko, nola udal eta mankomunitateen iritziak eta iradokizunak jaso eta ahalbideratzeko."

Eta hauek dira bere eginkizunak:

• Bizkaiko Lurralde Historikoko politikak koordinatzea, euskara sustatu eta biziberritzeko politika egokia eta eragingarria gauzatze aldera.


• Hizkuntza arloko aholkularitza eta laguntza ematea. Horrezaz gain, era guztietako prestakuntza eskaini, trebakuntza ikastaroak antolatu eta terminologia lantzea.


• Bizkaiko Lurralde Historiko osorako proiektuak prestatu eta garatzeko zerbitzuak eskaintzea, bai egun era egokian jarduten duten udal eta mankomunitateetako euskara zerbitzuentzat, bai ataza horretan oraintsu hasi berri direnentzat. Era berean, euskara sustatzeko irizpideak jakinarazi, laguntza eta aholkularitza eskaini, eta babesa ematea.

Azken batean, Bizkaiko Udal eta Mankomunitateetako euskara teknikariek eguneroko lana burutzeko laguntza da Alkarbide. Benetako laguntza, gainera.

Info gehiagorako hemen.

Bitxia. Banaketaren bidea hartu eta Elkarbide izendatu taldea.

Alkarbide izenarekin domeinurik ez dago martxan gaur, ikusi dugunagatik.

Gipuzkoako EAren sektore kritikoak Lurraldea.org webgunea erabili izan du azken hilabeteetan, bere ildo kritikoaren eta Iñaki Galdosen jardueren berri emateko.

LurraldEA hori, EA siglekin identifikatzen da oraindik, eta baita haren baitan aurkitu daitekeen Suspertu prozesua. Gaur oraindik ez dago Alkarbide ekimenaren berririk webgune horretan.

Monty Python-en Life of Brian filmeko pasarte hau gogoratzeko unea izan daiteke:

Bestalde, sektore honek webgunerako bederen Lurraldea izena erabiltzeari ironiko samarra deritzot: ez ote dakite zer izan zen Lurraldea Gipuzkoako EAren historian? Bereziki, Imanol Murua zenaren ibilbide politikoan zer pisu izan zuen Lurraldea mugimenduak Leitzarango autobidearen kontrako borroka haietan? Hilda dagoelako Murua zaharra, ez zuen bestela disgusto hau merezi.

Euskal Herriaren burujabetza helburu omen zuten politikarien artean mugimendu deigarria, logikoa, desiragarria batasunerantz akaso? Ez! Eszisioa da lo ke mola, IU ta EAn adibidez. EAren kasuan jada, gainera... eszisioaren eszisioa.Patetikoa, groteskoa, esperpentikoa, negargarria. Monty Pithon.en "Brianen Bizitza" baino gehiago, eskolumeek inprobisaturiko ginola dirudi. Hauxe behar genuen EHn... egingo digute berriz ere burutik behera kaka ta txisa.



Beno, pentsatzen dut Elkarbide hau EAJrekin elkartzeko bidea baino ez dela izango, baina orduan ere komeriak... ez baitago denontzako posturik, are gutxiago orain. Bitartean Azkarragak ere politika utzi du eta eraikuntza enpresa bat zuzentzeari ekin dio.

Barriro EAJra badoaz, banan-bana, eta goi mailatik barik, tokian-tokiko erakundeen bidez, udalerriz-udalerriz.



Bazkidetze "masibo"rik ez.

Artikuluan Josuk aipaturiko Gipuzkoako sektore ofizialean geratuko direnen zerrendan, Azpeitiko EAko zinegotziak izan daitezke agian. EAE-ANVko alkatea kargutik kentzeko haien botoa behar izan zuenean EAJk aurkezturiko zentsura mozioak, men egin zioten alderdiko aginduei, baina Iñaki Galdosen sektorearekin talka egin zuten zinegotziek polemika latz batean. Ondoren, Azpeitiko EAko militanteen artean zatiketa nabarmendu egin zen.

Bestalde, Goiok dioenaz: Alkarbide Bizkaiko Foru Aldundiaren zerbitzu bat izateak eraginik izango ote du alderdia erregistratzeko? Sustatu.com jaio zenean bazegoen Bizkaiko Foru Aldundian Sustatu izeneko ekimen bat, eta gaur egunean ere martxan dago, baina horrek ez dio eragozpenik suposatu Sustatu.com-en jarduerari, eta espero dugu haiei ere ez ziela kalterik egingo.

23 urteko historia pilatu du EAk eta, askoren begitara EAJren eszisio bat baino ez baldin bada ere, ez dira gutxi sekula EAJn militatu ez eta EAko kide d/zirenak. 23 urte eta gero eszisio soiltzat jotzea, agian, gurasokeria izan liteke.



Alderdi txikitu baten zatiketa den aldetik, ordea, militanteen sakabanaketa izan liteke hipotesi probableena: batzuk EAJra, beste batzuk Aralarrera eta asko politikatik at. Ikuskizun dagoena, EAk edo Alkarbidek, (i)nork lortzen duen, orain arte zuten hauteslegoaren zati nagusiari eustea. Dena dela, badirudi Alkarbidera jo dutela EAk boto gehien zituen lurraldeko hautetsiek; Gipuzkoakoek.



Nola eragingo ote du honek Nafarroako esperimentu bateratzailean, NaBain ?

Bitxia. Banaketaren bidea hartu eta bere postua ez utzi

Zatiketa izango da, ezer izatekotan.

Hori bera egin zuten EAJrengandik bereizteko duela 24 urte.

Hamaika aitzaki jarrita, baina sakonean, 1983an tokiko hauteskunde ostean erakundeak gobernatzeko EAJk planteatutako itunaren kontra egitea izan zen. Nafarroan abstentzioa emon eta trukean EAJ alderdiak hainbat erakundeetan agintea lortuko zukeen, Aldundi eta udaletan, Irungo udala tarteko, gogoratzen bozketa egunean boto-kutxa hegazean balkoitik behera,

Itun hori ez betetzean, Carlos Gaikoren aldekoak pilatzen hasi ziran,

Gerora hamaika aitzaki, LTH, eta beste.

Nafarroako erakundea "desegitea", eta 1986an EA sortzea. 1985ko udan EAJren bidez kargua lortutako hainbatek EA sortu zuten, eta hainbat batzoki, Iruñeako Gazteluko Plazakoa. eta beste hainbat, Gipuzkoan Oleta kaleko egoitza.



Hor EAKoak egindako lehen lapurreta.



Memoria laburrekoak dira Garaikoetxea, Amezketa eta Sabino Intxaurraga.

EAren esziozioa dela eta, horretaz eta Diputazioko karguekin zer egin beharko litzatekeelari buruz mintzatu zen atzo Euskadi Irratian EAko legebiltzarkide bakarra den Jesus Mari Larrazabal jauna.



Larrazabalek jakin badaki zer den hautatua izatea zerrenda baten baitan eta ondoren eszinditzea kargua berarekin eramanda.



1979tik 1983ra Jesus Mari Larrazabal Gipuzkoako Diputazian diputatu izan zen HBko zerrendetan aukeratua eta koaliziotik irten zen LAIAren izenean.



Horretaz hitz egin zuen hemen azpian atxikita doan elkarrizketan.Elkarrizketa hau Zeruko Argian (egungo Argian) argitaratu zen 1982ko apirilaren25an 931. alean. Argiaren hemerotekan aurki daiteke.





HB-EE Arteko Tartea Bete Behar Dugu



Agiña/Xalbardin



LAIAko Jesus Mari Larrazabal

HB-EE Arteko Tartea Bete Behar Dugu

Gipuzkoako Foru Aldundi edo Diputazioan aurkitu dugu Jesus Mari Larrazabal, LAIAren bulegoan. Bere alderdiko Kongresua bukatu berria da eta hango arazo eta erabakiak pil-pil daude oraindik. Haietaz mintzatu zaigu. Diputazioko barrean. Oraindik ere "iraultza" hitza entzuteaz harritzen direla diruditen horma eta tapizen artean. "Iraultza", "burruka armatua", "independentzia"... hitzek oihartzun berezia dute zura noblez eta butaka ederrez hornitutako saloi hauetan.



Ruptura Ezin; Posibilismorik Nahi Ez



ARGIA.- Kongresuaren gorabeherak aipatzetik hasi beharko dugu.



LARRAZABAL.Laugarren Batzarrearen bigarren zatia egin dugu, lehenengoa 1980.go uztailean, HBtik atera ta berehala, ospatu bait genuen. Orduan zintzilik geratu zirenak erabaki ditugu gaur: linea politikoaren mugaketa batetik eta burruka harmatuaren azterketa, gairik nagusienak bezala. Horretzaz gain LABi buruzko eritzia finkatu eta karguak aukera



ARGIA.Jende gaztea ikusi dugu mahaian.



LAR.- Jende oso gaztea sartu da bai zuzendaritzan. Eta gehiago: lehenengo aldiz zuzendaritza osoa erabat euskalduna izatea lortu dugu.



ARGIA. Kongresu oso gogorra izan duzuela esan da...



LAR. Debateak oso gogorrak izan dira, eta luzeak. Sakonak ere izan direla esan behar da.



ARGIA.Debate horiek gero zertan mamitu dira, LAIAk ze bide eremango du hemendik aurrera?



LAR.- Bi mailatan hartu dira erabakiak, epe laburrari begira eta erdi epe batera begira. Erdi epera LAIAk eramango duen bidea garbi dago: ezker abertzalean dagoen bipolarizaketa hausten saiatu. Zergatik? Batetik, esanak esan, Estatu Espainolean demokrazia burgesa ezarri delako; Euskal Herrian ezaugarri autoritario eta errepresibo batzuekin, frankismoarekin hautsi ez izanaren ondorioz. Baina demokrazia burgesa. Orain, beste aldetik, libertate nazionalei begira lehenean gaude.



ARGIA.- Zuen lekua Herri Batasunaren eta Euskadiko Ezkerraren arteko tartean bilatzen duzue, beraz. Nola ikusten duzue HB?



LAR.- HBkoentzat hau ez omen da demokrazia, lehen bezala omen gaude. Non dago ordea demokraziaren patentea? Berak nahi dutena, KASeko alternatibaren puntuetan dagoena, demokrazia burges "aurreratu" bat da, haustura edo rupturaren bidez lortu behar dena. Haustura horren posibilitatea, halabaina, amets hutsa da.



ARGIA.KASen alternatiba lortu behar dela esanez ibiltzea itxaropen hutsak sor eraztea da orduan.



LA R. Amnistia, Nafarroa, berreuskalduntzea... oso luzerako doazen puntuak dira. Nafarroa gero eta urrutiago dago, amnistia eta berreuskalduntzea zer esanik ez. Epe labur batera konpon daitezkeela esatea, "denok bilduko bagina"'etabar, gauzak hola daudela, jendeagan frustrazioak sortzea da. Intransijente eta gogorrak izan behar dugu, baina baita konszienteak ere.



ARGIA. Zuek bete nahi duzuen tarte horren beste aldean EE deukazue.



LAR.- EEk gaurko demokrazia onartzen du eta jokoan sartzen da. "Lortu duguna baliozkoa da eta hori behar da sakondu" diote. "Konstitzioaren alderdi onak" eta baloratzen hasi dira. Gradualismoaren bidez, demokrazia burgues hau sakonduz, helburuak lortuko direla uste dute. Azken finean horiek dira eurokomunismoaren predikuak. Guk garbi diogu: politika hori frakaso bat da iraultzaren bidean.



Ezker Abertzalea Pikutara Doa



ARGIA.EEren eta HBren artean beraz. Baina gauzak dauden bezala, bipolarizaketa izugarria delarik, zuek zer egin behar duzue tartean?



LAR.Ilusiorik sortu gabe, ezker abertzalearen birkonposaketan parte hartu nahi du LAIAk. Ezker abertzalearen barruan gauzak berriz planteatzen ez baditugu, erdi epe batera Ezker Abertzalea pikutara doa.



ARGIA.- Ezker Abertzalearen bi blokeen artean planteamentu berriak sartu... errezago dirudi esaten egiten baino.



LAR.- Hori badakigu, baina bipolarizaketa hautsi beharra dago. EEn batetik sektore ofizialak agintzen du, "neoabertzaleen" laguntzarekin. Taldea beren posizioetara eramateko Ezker Berrikoek dituzten ilusioak, hutsak dituk.

HB berriz gero eta gehiago KAS da, ETA (M)k daraman burrukan zentratua, hori da nukleo establea. Beste taldeak, gogora zaitez ESBz, lurperatu dira.

Ezker Abertzalean bi blokeak gero eta urrutiago beraz, beren jarrerak garbiago.



ARGIA.- Baina gaur egun Ezker Abertzaleaz hitz egin al daiteke?



LAR.- Bueno, bi blokeak hor daude, elkarren arteko harremanik gabe. Alde horretatik egoera inestablea ez dela esan behar da, baina bai nahasia. Guk EEn, aprobetxatzeko moduzko bakarrak Ezker Berri korrontekoak ikusten ditugu. Beren politika balantzakakoa bada ere: batzutan beren alderdian gehiengo diren korronteen politika jarraitzen dute xuxen-xuxen; beste batzutan, eta hori Diputazioan ikusi dugu, badakite botoa emateko orduan gurekin egoten, nahiz eta beren alderdiko zenbaiten eritziaren aurka izan.

Orain dilema batean daude Ezker Berrikoak: batzuek uste dute EE barruan jarraituz oraindik ere alderdiari buelta ematea posible dela. Beste batzuk ordea ilusioak uzten ari dira, beren alderdiak hartu duen bideari itzulerarik ez diote ikusten, eta zer egin planteatzen ari dira.



ARGIA.- EEko Ezker Berrikoekin zerbait egiteko esperantza baduzue. Eta HBko ze Jenderi begiratzen diozue?



LAR.- HBren arazoa konplejoagoa da. Batetik bere nukleo establea KAS da gero eta gehiago. Eta bestetik garai bateko herrietako montaketa lur jota dago.

Azken finean hor dagoen sentimendua "eutsi mutilak, eutsi" da. Ekaitza gogorra denean sentimentuak bildu egiten gaitu. HBri ez zaio bere bidea naturalitatez jarraitzen uzten. Familia batean anaiarrebak igual ez dira ongi konpontzen, baina kanpoko erasoaren aurrean familia osoa biltzen da.



ARGIA.Dena dela, HB eta EEren arteko tartea beteko duen indar hori osatzen hasteko garairik egokiena ez duzue oraingoa.



I:AR.- Ez, hauteskundeen aurrean gaude, eta elektoralismoak dituen ondorioak osatzeko asmoak erdi eperako dira. Epe laburrera, funtsezkoena erresistitzea da. Erasoak, lortu den pittinaren kontrakoak ere izugarriak dira. Gure printzipioetan iraun behar dugu, eta jendea egituratuz joan.

Guk bestalde, sigla eta hitzen fetitxismorik ez dugu, harreman zabal eta flexibleak edukitzeko asmoa dugu.



Erakundeetan Egon Behar Da



ARGIA. HBtik atera bazineten neurri haundi batean erakundeetan egon behar zela uste zenutelako izan zen. Nola ikusten duzue hori orain?



LAR.- Gure ustez hor egon beharra dago: Parlamentuan, Diputazioetan eta udaletxeetan egon beharra dago. Madrila joateari buruz ideia fijorik ez daukagu: azaltzekotan modu anormal batean joan beharko litzateke, era gogor eta agresibo batean. Hori ordea badirudi gero eta zailago dela, batez ere otsailaren 23az geroztik: hitzak neurtu behar dira, Konstituzioa juratu... mereziko al luke joatea? Seguru aski ez, baina oraindik ez dago erabakirik.

Edozein modutan ez dugu erakundeetan EEk egiten duena egin nahi: bide oso posibilista daramate, ez dakigu nora iristeko, politika derrotista. Konstituzioa erreformatu egin behar omen dela eta esanez dabiltza.



ARGIA.- Denboraldi bat badaramazue erakundeetan sarturik. Duzuen esperientziaren balorapen bat izanen duzue.



LAR.Sartzen zarenean konturatzen zaren lehenengo gauza erakunde inseguruak direla da, zentzu askotan triste eta miseriazkoak.

Borroka instituzionalean aurretik eta atzetik nahi ta ez herrian mugimentua egon behar du. Erakundeetako burrukak autonomoki ez du zentzurik. Udaletxeetan garbi ikusten da hori. Jende mailako mugimendu guztia atzeraka ari den unean, jendeari hor ari direla eta arazoak non dauden erakusteko garrantzitsuak dira.



ARGIA.- Diputazioan- ere bai? Ezer lortzen al duzue?



LAR.- Balantzea egiterakoan ez da begiratu behar zenbat lortu dugun. Baloratu behar da ea zenbat aldiz erakundeen ezina, diruen helburuak desbiatzea, Eusko Jaurlaritzarengandiko dependentzia ideologikoa... salatu ditugun. Salaketa permanentea alegia. Eta ez politika kutsuzko mozioetan bakarrik, beste arazo guztietan ere bai.



Burruka Harmatua, Beharrezkoa



ARGIA.- Ponentzietan eman diezuen lekuagatik eta debateetan ere sortu diren eztabaida gogorrengatik, ikusten da borroka harmatuaren azterketari garrantzia haundia eman diozuela.



LAR. Ponentziaren mamia baztertu eta azkenean enmienda onartu dela esan behar da lehenbizi. Ponentziak azterketa teorikoa eta ekintzen balantzea egiten zituen. Horrela iraultza biolentziarik gabe ezin dela aitortzen zuen ponentziak baina burruka harmatuak baldintza objetibo eta subjetibo batzuen neurrian, indibidualismoetan erori gabe. Ponentziaren aburuz, burruka harmatua ez da abangoardien eginkizuna, eta elitismoa buka dadin, une honetan moztu beharra dago. Nahiz eta burruka horrek laugarren maila batean frutu positibo batzuk sor ditzakeen.



ARGIA.Dena dela, aurrera enmienda atera zela esan duzu...



LAR. Aurrera atera den erabakian, ETAren balantzea positibotzat jotzen da, gaur ere bai, nahiz eta ekintza konkretuetan kritikatzeko gauza asko egon. Ez dela momentua arazoa zanjatzeko.

Dena dela, bai ponentzia eta bai enmienda ados daude Euskal Estatua lortzeko burruka harmatutik pasa beharko dela. Bakarrik, Kongresuan koiuntura baloratzen duen erabaki bat hartu dela.



Euskal Estatu Independiente Baten Atzetik



ARGIA.- Euskal Estatua diozu. Ez da askorik aipatzen azken bolada honetan.



LAR. Bakoitzak garbi esan behar du zeren atzetik dabilen. Guk Euskal Herriarentzat Estatu independiente bat; Estatu bat, dituen konnotazio guztiekin, on eta txar, eta ez zenbaiten burutan dabilen ez dakit zer ekologiko arraroren bat. Eta Sozialismorako transizioan joango den estatu bat, ez kapitalismoa sakontzeko, gradualismo prozeso batean: kapitalismoa biolentoki. hausteko.



ARGIA.Gaur bizi dugun giroan ez al dira eritzi gogorregiak?



LAR.Taktikoki ere gradualismo horretatik atera beharra dago. Esate baterako, hemen torturatzen da eta mundu guztiak daki. Poliziak ordea badaki PNV eta PSOE ere berekin dituela. EEk hor ditu erakundeak: haien bidez egin dezatela protesta. Sistemak beti bait ditu kanaleak hori lejitimatzeko: gogor jokatu nahiz bigun jokatu, bere garaian Estatuak beti lejitimatzen du bere jokabidea.

Orduan guk behar duguna programa politiko argi bat da, jendea biltzea posibilitatuko duena. Birkonposaketa hori talde harmatuetan ere gertatu beharko litzateke. Zein zentzu du bada "Estatutuari laguntza kritiko bat" eta holakoak planteatzea egungo egoeran talde harmatu batek?



ARGIA. Bueno, asmoak haundiak dituzue. Baina horren aurrean LAIA ez al da ia klub txiki bat? Zentzurik ba al du zuek leku horretan egoteak?



LAR. Europa guztian gertatzen zaie berdin indar iraultzaileei, txikiak direla, erreformisten alderantziz. Iraultzaileak asko bagina iraultza bihar bertan egingo genuke.

Gure lanaren zentzua? Erabaki ditugun helburuak lortzen saiatzea: Ezker Abertzalean dagoen espazio politiko hori osatzea. Denbora baten ondoren ezin dela ezer egin? Erreforma epeletan sartzeko prest leudekenak EEra joango lirateke, irtenbiderik ikusten ez zaion burruka batetan sartzeko prest egongo lirateke beste batzuk, HBn, eta beste zenbait "passatzera" pasako litzake. Orain, hori ez da gaurko egoera. Ezker Abertzalea berregiteko obligazio politikoa dugu, eta gure papera betetzen saiatuko gara.

AGIÑA

4-6

Dejá Vu triste eta kainita dugu begibistan nere irudiko. Birritan edo auskalo zenbatetan harri berberarekin estrapozo egiteko gai gara Oinaz ta Ganboatarren ondorengook. Alkarbideko Iñaki Galdosek EAri zera erantzun dio: "Orain karguak bueltatzeko eskatzen diguzue? Zuek 1986ean EAJtik aldegitean talde mistoetara pasa zineten".

Nola aldatzen diren gauzak kamarada...



"Guk Euskal Herriarentzat Estatu independiente bat; Estatu bat, dituen konnotazio guztiekin, on eta txar, eta ez zenbaiten burutan dabilen ez dakit zer ekologiko arraroren bat. Eta Sozialismorako transizioan joango den estatu bat, ez kapitalismoa sakontzeko, gradualismo prozeso batean: kapitalismoa biolentoki. hausteko".