Itzuli orri nagusira Bidali hau Inprimatu

Interneten erruz, musikarik gabe gelditzeko arriskuan gaude, dio EITBk

© cc-by-sa  Sustatu ¦ 2008-12-17 ¦ 08:41 ¦ p2p

EITB iragarki bat ari da emititzen egunotan irratiz eta telebistaz. Ez dugu beren webgunean aurkitu, baina gutxi gora-behera zera diote: Abesti bat jaisten duzun bakoitzean, musika itzaltzen hasten da eta horrela segitzekotan, guztiok musikarik gabe gelditzeko arriskua dugu. Ez jaitsi musikarik. EITB musikarekin bat.

Publizitatea

IKTeroak irakasleen blogean aurkitu dugu iragarki honen azalpena. Transkribapena gutxi gora-beherakoa da, ez baitugu aurkitu iragarkia bera inon.

IKTeroek lotzen dute kontua publikoa eta bereziki gazteak pirateriaren mamuarekin izutzeko eta adoktrinatzeko egiten diren kanpaina ofizialekin. Izan ere, ez bakarrik industriaren ordezkariek (SGAE, Cedro...) egiten dituzte kanpaina hauek, babes ofiziala ere izaten dute: ministerio eta kultura sailak, hezkuntza sareak, irrati-telebista publikoak...

Adoktrinazio ekimen hauen artean IKTeroen post horretan azpimarratzen dena, bereziki ikaragarria da: pirateriaren aurkako eskola funtzio bat. Informazioa beste mezu batekin osatu dute IKTeroek: Egileen eskubideak eta eskola.

Erantzunak

#1. Re: Interneten erruz, musikarik gabe gelditzeko arriskuan gaude, dio EITBk

josu ¦ 2008-12-17 ¦ 11:50

Historiari erreparatuz gero, EITBk dioena gezurra da. Duela gutxira arte egin eta zabaldu den musika, kultur adierazpide gehienak bezala, negoziorik gabe egin eta zabaldu da. Zorionez. Kultura-negozioa binomioa, gaur egun ezagutzen dugun tankeran, XIX-XX. mendeko kontua da. Eta euskal kulturaren kasuan, berantiar samarra. Areago, munduko herri askotara oraindik ez da iritsi; baina musika badute izan.
Denok onartuko dugu musikariek ere bizitzeko eskubidea dutela. Bide berriak asmatu beharko dira ordea etekina ateratzeko. Merkantzia fisikoen salerosketetarako diseinatutako sistemak ez baitu balio, digitalizazioaren garaian, informazioz egindako merkantziekin.

#2. Re: Interneten erruz, musikarik gabe gelditzeko arriskuan gaude, dio EITBk

ibon ¦ 2008-12-17 ¦ 18:19

Beharbada iragarki horretan ematen digute gakoa eitbn erabiltzen duten musika komertzialarekin amaitzeko. Pirateatuz musika komertziala ezabatu ahal dugu, ta bakarrik geratuko zaigu dirunahirik gabe egiten den musika, barnetik ateratzen dena, egiazkoa.
Tamala da, ez da musika komertziala desagertuko, Beka Junkerari eman dioten dirulaguntzekin, nork behar du diskorik saldu?

#3. Re: Interneten erruz, musikarik gabe gelditzeko arriskuan gaude, dio EITBk

josu ¦ 2008-12-17 ¦ 20:25

Oroitzapen lauso bat etorri zait, ea inork konfirmatu ahal duen. Zurrumurru bat egon zen duela urte batzuk, ETBk kendu egin zuela euskal musika Goenkaletik, egile eskubideak ez ordaintzeko.

Egia balitz, ederra paradoxa!

#4. Re: Interneten erruz, musikarik gabe gelditzeko arriskuan gaude, dio EITBk

Lulu ¦ 2008-12-17 ¦ 22:22

Eitben lan egin duenak badaki eitbn bideoak musikatzeko, irudiei musika jartzeko eta abar erabiltzen den musika gehiena emuletik jaisten dela, musika eta hainbat irudi, dena emuletik "modu piratan" eta ordaindu gabe. Hori bai, hemengoa eta euskarazkoa ahalik eta gutxien erabiltzen da, ez ordandu behar izateko. Hori horrela da. Eitbko egoitzetako hanbat ordenagailutan dago Emule instalaturik. Kanpaina hau, beste hainbat bezala, itxurakeria eta hipokresa hutsa dira...

#5. Re: Interneten erruz, musikarik gabe gelditzeko arriskuan gaude, dio EITBk

Imanol ¦ 2008-12-18 ¦ 14:17

Baina pentsatzen dut, EiTBk SGAEri kuota ederra ordainduko diola. Esango nuke garrantzitsuena ez dela komunikabideek musika nondik ateratzen duten, erabiltzeagatik ordaintzen duten ala ez baizik.

#6. Re: Interneten erruz, musikarik gabe gelditzeko arriskuan gaude, dio EITBk

Bartolo ¦ 2008-12-20 ¦ 21:31

Nik hurrengoa esango nioke ETB-ri.

ETB-ek bikoiztua dagoen filma eta telesail oro euskara gabe ateratzen ahalbidetzen duen orotan, euskara itzaltzen da eta horrela segitzekotan, guztiok euskara gabe gelditzeko arriskua dugu. Ez utzi ETB euskararen jabe bakarra bihur dadin, jeitsi eta kopiatu ETB-ek euskaraz editatzea uzten ez duen telesail eta filme oro:

Hemendik has zaitezkete: http://aokromes.clanogre.net/smf/index.php
http://arkadiaeuskalontzia.blogspot.com/

Eta lagundu zabaltzen jendeak musu truk sortzen hari den euskarazko azpitituloak:
http://aokromes.clanogre.net/smf/index.php
http://www.manterola.org/azpitituluak
http://arkadiaeuskalontzia.blogspot.com/

Zeintzuk oraindik euskara gabe ateratzen ari diren ikus daitekeen toki bat hurrengokoa duzue: www.blogak.com/iruditxokoa/


>>>ETBk kendu egin zuela euskal musika Goenkaletik, egile eskubideak ez ordaintzeko.

Bai esan diezazuket euskal aktoreak kexu izan zirela errepikapenetan ordaindu beharrekoak jasotzen ez dituztela, eta euskal bikoizleak antzera dabiltzatela.

#7. Re: Interneten erruz, musikarik gabe gelditzeko arriskuan gaude, dio EITBk

amonamantangorri ¦ 2008-12-24 ¦ 02:54

ADSL konexioa duen ordenagailu txar bat eskura edukita, zertarako erosi diskoa? Arrazoi moralengatik? Ba al dakite horiek zein mundu zakurretan bizi garen? Bai, badakite; baina hipokritak dira.

Musikari eta ekoizleek badakite gauzak zeharo aldatu direla. Euskal disko-etxeek dagoeneko ia inori ez diote diskoaren grabazioa aldez aurretik ordaintzen, garai batean egiten zuten bezala.
Metakek hondoa jo zuen, eta haren bidea jarraituko dutenak. Beste zerbait asmatu behar dela, hori denek dakite.

Ken7 bezalako produktuek CDaren aroan funtzionatzen zuten; orain joan daitezela Wiskonsinera nahi badute beren potxolokeriak grabatzera; ez du balio.

Publizitate lakrimogeno hori sobran dago, erabat. Erreguka hasten badira, oso-oso gaizki daudela sinale. Erabil dezatela mehatxua; horrek betidanik funtzionatu du, mundua mundu denez geroztik.Baina oraingoan ez dut uste...



Erantzun artikulu nagusiari

Pil-pilean!

Erantzun gehien izan dituzten albisteak