Itzuli orri nagusira Bidali hau Inprimatu

Ibarretxeren galdeketa zuzenketekin argitaratu da EHAAn

© cc-by-sa  Sustatu ¦ 2008-07-15 ¦ 11:53 ¦ politika

Gaur argitaratu da EAEko buletin ofizialean, EHAAn, Legebiltzarrak onartutako Kontsultaren Legea. Ekainaren 27ko plenorako aurkeztu zen papeleta eredua ere han dago, baina zuzenketa batzuek eginda gaztelaniaz: euskaraz, aldiz, 1go ordinal okerrarekin jarraitzen du.

Publizitatea

Ekainean argitaratu genuen bezala, Juan Jose Ibarretxek aurkeztutako papeleta ereduan euskarazko ordinal okerra, edo bederen, ez-estandarra, zekarren lehen galderak: 1go galdera. Baten batzuek nabarmendu zutenez, gaztelaniaz ere bazeuden akatsak: SI baiezkoak azentua behar duela, SÍ.

Bada, gaurko EHAAko argitalpenean ikusten ahal da SÍ gaztelaniazkoa zuzendu dutela, baina 1go euskarazkoak bere horretan jarraitzen du.


Argazkiak.org | Kontsultarako papeleta © cc-by-sa: herri.admin

Horrez gain, espainolezko galderen ordinaletan formula arraroak sartu dituzte: 1ª eta 2ª estandarrak agertu beharrean (lehen bertsioan hala zeuden, ondo), puntua tartekatu dute: 1.ª eta 2.ª dira orain.

Erantzunak

#1. Re: Ibarretxeren galdeketa zuzenketekin argitaratu da EHAAn

Jakue Goienetxe ¦ 2008-07-15 ¦ 18:54

Lastima, bai: behin zuzentzen hasiz gero, aukera ederra zuten "1go" hori ere zuzentzeko. Eta harrigarria, orobat, gaztelaniazkoan sartu dituzten "1.ª" eta "2.ª" forma bitxiak (eta okerrak, jakina).
Bestalde, ez dakit inork aipatu duen, baina bada beste akats bat, nabarmena hura ere: letra larrien erabilera "Galdera" eta "Pregunta" hitzetan.
Azkenik, iruzkintxo bat honako pasarte honi buruz:
"... ETAk aldez aurretik erakusten badu zalantzarik gabeko moduan indarkeriari..."
Nik, behintzat, argi eta garbi ikusten dut "zalantzarik gabeko moduan" hori koma artean joan beharko litzatekeela. Izan ere, "erakutsi" aditzari dagokio; testuan ageri den gisan, berriz, "zalantzarik gabeko moduan [...] amaiera ematea" adierazten du, hots, "poner fin de forma inequívoca" (eta ez "manifiesta de forma inequívoca"). Beraz, horra bi galdera desberdin, euskarazkoa edo gaztelaniazko irakurriz gero.

ps: bidenabar, Sustaturen albistean ere bada akasño bat: "baina zuzenketa batzuek eginda gaztelaniaz" dioen tokian, "zuzenketa batzuk" esan beharko luke.

#2. Etxeetara iritsi den Lehendakariaren galdeketa-orria

Sustatu ¦ 2008-07-23 ¦ 08:51

Eusko Jaurlaritzako Lehendakaritza EAEko etxeetan galdera orriak banatzeari ekin dio: postaz iristen dira, Juan Jose Ibarretxeren gutun batekin.

Galdeketa orri horiek ez dira hemen ageri dena bezalakoak, EHAAn argitaratutako eredukoak; ekainean aurkeztutako hura da, aldiz. Gaztelaniaz SI azenturik gabe dakarren ale hori.

#3. Re: Etxeetara iritsi den Lehendakariaren galdeketa-orria

Sustatu ¦ 2008-07-24 ¦ 08:45

Banatu den gutunari buruzko komentario batzuk Elena Laka abokatuaren blogean. Erantzunetan ere, iruzkin interesgarriak.

Erantzun (klik zabaltzeko)

Facebook bidez erantzun