Microsoften euskararentzako produktu berrien aurkezpen ekitaldia

© cc-by-sa Sustatu ¦ 2008-06-18 ¦ 09:00 ¦ Informatika

Eusko Jaurlaritzako HPSk eta Microsoftek etxe honen produktu batzuen aurkezpen ekitaldi bat antolatu dute ekainaren 25erako, Donostian. Gonbidapen oharrak dioenez, "Ekainaren 25etik aurrera, euskara ordenagailuen interfazeko hizkuntza nagusi bezala aukeratu ahal izango da. Dell, Investronica, HP eta Microsoft etxeek apustu garbia egin dute Euskadiri begira, euskara sustatzearen alde eta ekoizpena IKT tresnen bidez hobetzearen alde."

Publizitatea

Jardunaldiak izenburu hau du, IKT tresna berriak euskaraz, ekoizpena hobetzeko, eta bertan hiru gauza aurkeztuko dituzte:

Klik egin euskarari kanpaina.
Euskarazko programak deskargatzeko eta erabiltzeko Microsoft-ek sortutako azken berrikuntzak.
Euskarazko liburutegiak aurreinstalatuta izango dituzten ordenagailu belaunaldi berriak.

Miramongo teknologia parkean izango da jardunaldia, eta hemendik eman daiteke izena.

Hauxe da programa:

12:00. Euskara, hizkuntza bat gehiago Informazioaren Gizartean. Miren Azkarate, Eusko Jaurlaritzako Kultura sailburua

12:10. Microsoften apustua Jakintza Gizartearen alde Euskadin. Rosa García, Microsofteko presidentea

12:20. IKT tresna berriak euskaraz, ekoizpena hobetzeko. Juan Pedro Isasa, Microsoft Ibérica-ko sektore publikoko kudeatzailea; Arturo Parrilla, sektore publikoko salmenta zuzendaria (Dell); Koldo Ruiz, Ipar Eremuko zuzendaria (HP), eta José Antonio Landrove, eragiketa saileko zuzendaria (Investronica)

12:50 IKT produktuak euskarara lokalizatzea. Begoña Gutierrez, Informatika eta Telekomunikazio zuzendaria

12:55. Informazioaren eta Komunikazioaren Teknologiak, euskararentzako eremu estrategikoa. Patxi Baztarrika, Eusko Jaurlaritzako Hizkuntza Politikarako sailburuordea

13:05. Koktela.

Erantzunak

#1. Re: Microsoften euskararentzako produktu berrien aurkezpen ekitaldia

leire ¦ 2008-06-18 ¦ 11:34

Eta znbat kostatuko zaigu aurkezpen hau (lokala, hitzaldiak, koktela...)? eta microsoft-i ordaintzea? Zenbat kobratu dute librezalekoek? zenbat kostatzen zaizkigu erabiltzaileoi microsoft-eko produktuak? eta firefoxekoak?
Zein interes ekonomiko daude tartean?
Zelako usain txarra!

#2. Re: Microsoften euskararentzako produktu berrien aurkezpen ekitaldia

Karmel ¦ 2008-06-18 ¦ 14:03

Hainbat galdera...

Eusko Jaurlaritzak edo HPSk noizko antolatuko ditu, adibidez, Librezale-koekin batera edo GNU/Linux zabaltzen dabilen komunitatearekin batera, GNU/Linux-i buruzko jardunaldi batzuk, eskura dauden produktuen berri emateko, edo beste gai batzuk jorratzeko?

Eusko Jaurlaritzak noiz arte itxiko dizkio ateak software libreari Hezkuntza Sailaren eskumeneko herri eskoletan, institutuetan, eta abar?

Gure seme-alabek zergatik dihardute ikasten informatika "gaztelaniaz" Windows sistema eragilea darabiltela bakarrik?

Zergatik ez bideratu diru publikoa GNU/Linux gizarte osoan zabaltzeko?

Orain ere "burua lehengo lepotik".