Itzuli orri nagusira Bidali hau

haur bat adoptatzeko arrazoiak

Lorea ¦ 2006-02-02 ¦ 09:22 ¦ bestelakoak

Nire buruari galdetzen diot zeintzuk ote diren haur bat adoptatzeko arrazoiak

Publizitatea

Askotan entzun izan ditut elkartasuna, miseria, pobrezia, beharra, maitasuna eta horrelako hitzak. Hitz hauek haur baten bizitzari lotuta entzun izan ditut. Hain zuzen ere adopzioan hartzen diren haurrei lotuta. Horregatik nire buruari galdetzen diot, ume bat adopzioan hartzen denean, zerbait salbatzearen sentsazioa ote du jendeak? bizitza hobeago bat eskeintzeko ahalmena dutela pentsatzen ote dute? zer da beraientzat haur hori eskuratzea? ..... Azken finean, zeintzuk dira haur bat adoptatzeko benetako arrazoiak?

Erantzunak

#1. Modu ortodoxoaren berdinak

metaltrainer ¦ 2006-02-02 ¦ 09:29

Nire ustez, normalean modu estandarrean haurrak ekartzearen arrazoi berdinak dira. Bai, izango dira Afrikara turismo egitera joan eta kaleko haurrak adoptatu dituztenak, baina hori ez da kasu orokorra izaten. Zergatik izango zen desberdina?

#2. Re: haur bat adoptatzeko arrazoiak

Juan Luis  ¦ 2006-02-02 ¦ 11:42

> zerbait salbatzearen sentsazioa ote du jendeak? bizitza hobeago bat eskeintzeko ahalmena dutela pentsatzen ote dute? zer da beraientzat haur hori eskuratzea? .....
> Azken finean, zeintzuk dira haur bat adoptatzeko benetako arrazoiak?

Lorea, ez dut ulertzen zure kartaren zentzua, baina nire kasua kontatuko dizut. Bost urtetan ume biologiko ekartzeko ahaleginak egiten eman eta gero, bost minututan erabaki genuen, nik eta orain nire emaztea denak, adopzioaren bideari ekitea. Eta, prozesu luze baten ostean, bizpairu hilabete barru edo, Txinara joango gara gure alabaren (edo semearen) bila.

Ez dakit, gure buruari ez genion horrelako galdera traszendentalik egin (nahiz eta hau gure bizitzako aukera inportanteena izan). Modu naturalean eta inolako zalantzarik gabe hartu genuen erabaki hau. Guk asko jasoko dugu gure umearengan eta berak Txinan izango lukeena baino bizimodu hobeago bat. Ez dago besterik.

Ez dakit zertarako hainbeste duda. Aukera hau ez da hain arraroa. Hemen umeak falta dira, batzuk ume biologikoak izateko zailtasunak ditugu eta hainbat lekutan gurasoak falta dira.

Badirudi adopzioa bogan jartzen ari dela gure gizartean, baina ez dugu hau egiten bogan dagoelako, gurasoak izan nahi garelako baizik. Eta ziur-ziur gaude gure alaba gurekin zoriontsua izango dela, eta gu berarekin, bestela ez genuke adopzioan hartuko, noski.

#3. Re: haur bat adoptatzeko arrazoiak

xabier Etxaniz Rojo ¦ 2006-02-02 ¦ 11:42

Zeintzuk dira haur bat mundura ekartzeko arrazoiak? galdera erantzun eta hortxe aurkituko dituzu haur bat adoptazteko benetako arrazoiak.

#4. ARRAZOIA, BAKARRA

ainara ¦ 2006-02-02 ¦ 19:18

Zeintzuk diren haurra adoptatzeko arrazoiak? Arrazoia bakarra da: haurra izateko nahia, gogoa edo desioa. Ez du asko axola aurretik beste haur bat izan duzun ala ez, edo izateko gai zaren ala ez, azken finean, haur bat nahi duzula da kontua. Haurra nahi izatea, haurra edukitzeko gogoa sentitzea edo haurra desiratzea norberarengan dagoen gauza da. Berdin da zein aitzakiarekin hartutako erabakia den; elkartasuna, miseria, pena, pobrezia, beharra, maitasuna, arazo biologikoak… azpian dagoen helburua bakarra da: norberarengan dagoen haurra izateko nahi, gogo edo desio hori asetzea.

#5. Adoptatzeko arrazoi eta arazoen inguruan

isabel ¦ 2006-02-02 ¦ 19:33

Adopzioa egiteko arrazoirik nagusiena familia osatzea da. Baina, adopzioa egiteko izapideak betetzea oso zaila da: 25 urte izatea, haurra baino 14 urte gehiago edukitzea, egoera ekonomiko apartekoa edukitzea, eta gainera, administrazioak “oniritzia” ematea.
Bestalde, gay bazara, ume espainiarrak soilik adopta ditzakezu; hau da, ez daukazu adoptatzerik.
Lorea, zeintzuk kezkatzen gaituzte gehien? Adoptatzeko arrazoiek ala adoptatzeko arazoek?

#6. Ez dago arrazoi bakarra

iker ¦ 2006-02-03 ¦ 08:54

Ez dut uste arrazoi bakarra dagoenik, bakoitzak berea izan dezake, seme biologikoak edukitzerakoan arrazoiak bakarrak ez diren moduan. 5 urte inguru daramatzat adopzio munduan murgilduta, eta adoptatzaile askorekin izan dut harremana eta arrazoi desberdin asko ikusi ditut: batzutan antzutasunak bultzatzen ditu gurasoak, bestetan biologikoak izatea baino adoptatzea nahiago izateak, bikoterik ez eta guraso izan nahi dutenak ere badaude, baita gay eta lesbiana bikoteak ere, umeei bizi hobea eman nahi diotenak, edo baita modan dagoelako adoptatzen dutenak ere.

Baina bizitza honetan denak ez dira arrazoiak, sentimentuak ere hor daude, eta nere kasuan ez dakit adoptatzeko arrazoia zein litzaken, baina badakit era horretan izan nahi dudala guraso sentitzen dudala.

Erantzun (klik zabaltzeko)

Publizitatea