IV. Zernola Olinpiada jarri du martxan Elhuyar Fundazioak

Zernola.net - Elhuyar Fundazioa ¦ 2005-09-27 ¦ 07:13 ¦ Irakaskuntza

Euskal Herriko DBHko 1. eta 2. mailako zientzia eta teknologiaren inguruko olinpiada hau urritik ekainera bitartean egingo da, Internet bidez. Olinpiadan izena emateko epea jada irekita dago.

Publizitatea

Urrian jarriko du martxan IV. Zernola Olinpiada Elhuyar Fundazioak, www.zernola.net atariaren bitartez. Lehiaketa horretan, Euskal Herri osoko DBHko 1. eta 2. mailako ikasgelek hartu ahal izango dute parte. Helburua da gaztetxoei erakustea zientzia dibertigarria izan daitekeela. Olinpiadan parte hartzeko epea irekita dago jada, eta, horretarako, www.zernola.net atarira jo behar da. Aurten, gainera, lehenengo hiru sailkatuek saria jasoko dute: lehenengo bi gela irabazleek aterpetxe batean bi eguneko egonaldia egiteko aukera izango dute, Arabako eta Bizkaiko foru-aldundiei esker. Hirugarren sailkatuak, aldiz, Sobron Abentura parkerako sarrera irabaziko du, Sobron Abentura taldeari esker. Joan-etorriak Aizpurua Autobusen esku egingo dira.

Olinpiadaren dinamika
Lehiaketan parte hartuko duten gelek www.zernola.net atarian argitaratuko den zientziaren inguruko proba bat gainditu beharko dute hilero, urria eta apirila bitartean. Probak gelakide guztien artean egiteko dira. Erantzuna landutakoan, posta elektroniko bidez bidali beharko dute zernola@elhuyar.com helbidera. Olinpiada-amaierako sariez gain, hilero banatzen ditugu sariak; Berriak, Donostiako Aquariumek, Gaztetxulo aldizkariak, Eusko Jaurlaritzako Ingurumen Sailak, Zientziaren Kutxaguneak, Kukuxumusuk eta Karpin Abenturak eskainitako sariak jasoko dituzte aurten hilabete bakoitzeko probak ondoen egiten dituzten ikasgelek. Lan irabazleak www.zernola.net atarian egongo dira ikusgai.

Olinpiadaren bukaeran, parte-hartzaileek elkar ezagutzeko aukera izango dute Iruñeko planetarioan egingo den festa batean.