Interneteko albistegia

Gipuzkoako Foru Aldundiaren blogak Diario Vascon egongo dira

© cc-by-sa Sustatu ¦ 2005-04-26 ¦ 09:05 ¦ blogak

Eta, noski, elebakarrak izango dira, gaztelaniazkoak. Gipuzkoako Foru Aldundiak eta Diario Vasco egunkariak elkarrekin antolatu dute "blog&roll" izeneko lehiaketa. Maiatzaren 3tik aurrera Diario Vasco-n sortutako blogak saritzeko lehiaketa da.

Publizitatea

Blog horiek gaztelaniazkoak izan beharko dira. Ez du oinarrietan horrelakorik jartzen, baina informazio guztia eta oinarriak bakarrik gaztelaniaz daudela eta epaimahaiko gehienek euskaraz ez dakitela kontuan hartuta, hala izango dela pentsatzen dugu.

Hiru kategoriatan emango dira sariak eta 1.000 euro jasoko ditu kategoria bakoitzeko irabazleak:

Gaurkotasuna (Actualidad)
Kirolak (Deportes)
Aisialdia eta zaletasunak (Ocio y Aficiones)

Maiatzaren 3an hasi eta 31ra arteko artikuluak, iruzkinak eta erantzunak hartuko dira kontuan blog&roll lehiaketan.

Epaimahaia hauek osatuko dute: Joaquín Villa, Iñigo Espinosa, Óscar Terol, Mitxel Ezquiaga, María José Cantalapiedra eta Barcepundit.

Lehenagotik Eibar.org eta goiena.net-ek egiten diharduten blog komunitateak (goiena.net/blogak eta eibar.org/blogak ez dira babestu Berrikuntzarako eta Jakintzaren gizarterako departamendutik. Hau da hau! Zein gogorra den euskalduna izatea.

Erantzunak

#1. Re: Gipuzkoako Foru Aldundiaren blogak Diario Vascon egongo dira

eneko ¦ 2005-04-26 ¦ 09:34

Atzo ailegatu zitzaidan Foru Aldundiko iragarkia eta Gipuzkoa.Net atariaren azalean ikusi nuen lehiaketa hau. Aluzinatu egin nuen. Gipuzkoako Foru Aldundia Diario Vasco-ren blogetan edukiak sortzea bultzatzen eta sariak ematen.

Eibar.org-en, Goiena.net-en, Berriemaile, Blogger edo beste plataforma baten idazten duten blogariek ez dute sustapen hori jasoko edo saririk irabazteko ezkubiderik. Bakarrik Diario Vascon idazten badute.

Larreategiren blogaren bidez Xake Olinpiada jarraitu genuen, Joxe Aranzabalek Sustatun idatzi zuen azken asteetan euskarazko libururik salduena izan dena eta gaur egun bere Faroan jarraitzen du, Mendigurenen blogean Donostiko Zinemaldia, beste gipuzkoar bat Iker Aranberri EHU-ko blogari onena izendatu zuten, eta abar, eta abar. Baina ez, Berrikuntzarako eta Jakintzaren gizarterako departamendutik ez dute jasoko babesik, baldin eta Diario Vasco-ren blogetan idazten ez badute.

Ez dut ulertzen eta horregatik, azalpenak eskatzen, idatzia bidali nuen Foru Aldundira. Anonimoki edo, nahiago baduzu, izen abizena emanda bidali dezakezu formulario honetatik

#2. Re: Gipuzkoako Foru Aldundiaren blogak Diario Vascon egongo dira

I. Arregi ¦ 2005-04-26 ¦ 11:51

>
Ba dirudi zenbait politikorentzat euskararen mundua ghetto batean mantendu beharrekoa dela.

Diskriminazio positiboa egitea, euskaraz egiten diren komunikabideentzat eta kultur ekintzentzat diru kopuru bereziak izendatzea da, antza denez.
Beraz, interneten zerbait euskaraz garatzen bada, dagozkion dirulaguntzak euskara sustatzeko partidetatik joan beharko dira. Kontzeptualki, euskararen aldeko dirulaguntzak izango dira.

Erdaraz badira, beste izen propio batzuk mereziko dituzte ekimen hauek eta "Berrikuntza eta Jakintzaren sustapenarekin edo eta informazio gizartearekin" lotura zuzena duten ekimenak izango dira aurrerantzean. Hau bai serioa eta ez beste baserritar kaskajo horiek egiten duten lana! Horrela lortu dugu diskriminazio positibo zena diskriminazio negatibo bihurtzea.
Uste dut badela garaia bateron batzuk honen inguruko gogoeta bat egin dezaten. Badela garaia blogen sail honetan adibidez, Euskal herrian aitzindari izan direnak saritzekoa egindako lana errekonozituz, azken orduan arrazoi komertzial eta ideologikoak tarteko iritsi denari besarkadak eta dirua ematen ibili ordez.

#3. Re: Gipuzkoako Foru Aldundiaren blogak Diario Vascon egongo dira

txiber ¦ 2005-04-26 ¦ 12:03

Eta non geratzen da gure politikoek euren plan ponpoxoetan (EBPNetan) aldarrikatzen duten transbertsalitate kontzeptu hori?
Beste galdera bat: zergatik Gipuzkoako Foru Aldundiak dirua ematen dio bere kontra etengabe ari den komunikabide bati? Ia erdara hutsez argitaratzen den komunikabide bati?

#4. Ia erdara hutsez?

Luistxo ¦ 2005-04-26 ¦ 16:57

> Beste galdera bat: zergatik Gipuzkoako Foru Aldundiak dirua ematen dio bere kontra etengabe ari den komunikabide bati? Ia erdara hutsez argitaratzen den komunikabide bati?

Blogen kasuan, "ia erdara hutsez" ez. Blog sariketa hori, erdara hutsez dago, eta erdara hutsezko interfazea du Diario Vascoko blog azpiegitura. Beraz, "ia" barik. Erdara huts-hutsez.

#5. Re: Gipuzkoako Foru Aldundiaren blogak Diario Vascon egongo dira

Andoni MIranda ¦ 2005-04-26 ¦ 20:06

> Bainan, zer espero duzue Joaquin Villa-ren eskutik. Gizon honi bost axola zaizkio Euskara eta Blog kontuetan aintzindari izan diren Arantzabal, Luistxo, Eibartarrak, Goiena eta abar.

Luistxok ongi esan duenez, Diario Vasco egunero ari zaio erasoan Foru Aldundiari.

Uste dut gorago jo behar dugula, hau da Txabarri eta Iñaki Galdos. Bat, Aldun Nagusia eta bestea EA-ko Gipuzkoako presidentea.

Bai jaunak, getoan gaude euskaldunak izateagatik.

#6. Re: Gipuzkoako Foru Aldundiaren blogak Diario Vascon egongo dira

joseba ¦ 2005-04-27 ¦ 11:41

harrigarria da.

edo agian ez.

DV botere faktikoa da Gipuzkoan eta Aldundiak berari men egitea negargarria da, euskaldun nahiz abertzale ikuspuntutik.

baina, finean, gipuzkoarrek eurek egiten dute DV botere faktiko, egunero egunero txintxo txintxo erosten dituzten milaka alerekin. kexatzerik ez, hortaz: DV da gipuzkoak kioskoetan zerrenda "bozkatuena" !

#7. Re: Gipuzkoako Foru Aldundiaren blogak Diario Vascon egongo dira

aercilur ¦ 2005-05-06 ¦ 15:39

arauetan ez da iñun agertzen euskeraz idatzi ezin danik.
Ni bi hizkuntzetan idazten ari naz.

http://blogs.diariovasco.com/infomania.html

Erantzun (klik zabaltzeko)