Itzuli orri nagusira Bidali hau

Skype: Interneteko P2P "telefono" erraminta berria

Jonmikel ¦ 2004-01-20 ¦ 10:09 ¦ telefonoa


Sortu dute Interneten "telefonoz" hitz egiteko peer-to-peer erraminta berria. Bere izena da Skype, eta modem konexio sinplea erabiliz Internet bitartez "telefono" deiak egiteko aukera ezin hobea ematen du.

Publizitatea

Skype du izena eta musika jaisteko Napster, eMule, Kazaa edo bestelako aplikazioen moduan funtzionatzen du. Konektaturik norberak bere lagun eta senideen zerrenda pantailan ikus dezake... lagun baten izenean klik egin eta "telefono" deia egiten da. Erraza da oso.

Bere ezaugarririk onena, zalantzarik gabe, soinu kalitatea da: oso garbia da...

Momentuz Windows-peko PCetarako dago eginik (soilik Windows 2000 eta XP), eta ez dute baztertzen beste sistema eragile eta plataformatan sistema gauzatzea. Eskatzen duena, PC azkartxo bat (azkeneko 2-3 urteotan erosia gomendatzen da), mikrofonoa eta bozgoragailuak.

Eta azkenik, euskaldunontzako ere badu bere abantailtxoa: nahiz eta jatorriz euskaraz ez etorri, aplikazioaren etiketa eta barne-testu guztiak edozein hizkuntzara itzuli daitezke (euskarara barne, noski); trabatxo bakarra, testuok itzuli behar direla.

Kontutan hartzeko erraminta zalantzarik gabe. Telefono deien faktura jaitsi nahi baduzu, hemen aukera on bat...


Erantzunak

#1. Ze hardware behar da Skype-rekin?

Luistxo ¦ 2004-01-20 ¦ 14:46

Barkatu nire galdera inozo samarra bada, baina ez dut ideia handirik...

ze hardware behar dut? Telefono bat lotu behar diot PC-ari? Mikro bat? Nola, zein zulotatik zer?
(altabozak badauzkat...)

#2. Luistxori erantzunez...

Jonmikel Intsausti ¦ 2004-01-20 ¦ 17:09

Luistxo, adarra jotzera bazatoz, ADARRA JO IEZAIEZU BESTEEI --NIRI EZ!!! Badakizu, inozoak bere hitzekin erakusten du bere izaera. Mezu honekin zurea agerian uzten ari zara.

Nik nire mezuak seriotasunez idazten ditut, eta idatzi izan ditut orain arte, eta konstruktibo izaten saiatu izan naiz beti. Erantzun hau lerro berean doa... Mezu honek min egin badizu, zuk jakingo duzu zergatik.

Niregatik, hemen amaitzen da nire kontribuzioa.

Luistxo, ongi izan eta ongi segi... zure bidea.

> Barkatu nire galdera inozo samarra bada, baina ez dut ideia handirik...
>
> ze hardware behar dut? Telefono bat lotu behar diot PC-ari? Mikro bat? Nola, zein zulotatik zer?
> (altabozak badauzkat...)

#3. Lasai Xan!!!

Gari Araolaza ¦ 2004-01-20 ¦ 17:16

Jonmikel:

Luistxo benetan ari zen.

Duela ordubete inguru ibili da gure inguruan ere galdera berdinak egiten eta azkenean hor zehar aurkitu dugun webcam baten mikrofonoa erabiliz egin dugu saiakera zurekin kontaktatzeko.

Keep cool. ;-)

#4. IP telefonia

Gari Araolaza ¦ 2004-01-20 ¦ 17:32

Izan ere, aspaldian ezagunak dira zenbait IPren gaineko telefonia sistema. (eta agian horregatik egiten zuen galdera Luistxok)

Sistema hauekin, eta sarerako lotura potentea duten enpresek beraien bi zentru lotu ditzazkete prezio oso baxuetan. Horretarako, telefono aparailu, zentralita eta abarreko bereziak behar dira.

Cisco da horrelako produktuak eskaintzen dituen enpresa bat, eta British Telecomek hardware hori erabiltzen du beraien bezeroei IP bidezko telefonoa eskaintzeko.

Jonmikelek azaltzen duen sistema hau aldiz, betidanik egon den NetMeeting horren parekoa litzateke, baina kalitatea hobetuz eta zerbitzari zentral batetan oinarritutako direktorio batekin baino, P2P motako erabiltzaile direktorio batekin.

#5. Ordenagailuaren zuloak, eta mikro edo telefono bat konektatzeko ezjakinaren zailtasunak

Luistxo Fernandez ¦ 2004-01-21 ¦ 08:47

> Luistxo, adarra jotzera bazatoz, ADARRA JO IEZAIEZU BESTEEI --NIRI EZ!!!

Hemen gaizki ulertu bat dago.

> Badakizu, inozoak bere hitzekin erakusten du bere izaera. Mezu honekin zurea agerian uzten ari zara.

Agerian dago ez nekiela zer egin behar zen, eta horixe utzi nahi nuen agerian, ea inork laguntzen zidan, apur bat gehiago jakiten. Nire ezjakintasuna argitzearekin, konstruktibo izatea ere nahi nuen.

Nik ez dut sekula mikrorik konektatu PC-arekin. Eta lanean, azkenean, batzuek erakutsi didate webcam bat USB zulo bati lotuta egin daitekeela... Baina hori ote da bide bakarra?

Nire etxeko PC-ak zulo asko ditu, eta ez dago batere argi zer satu behar zaion nondik, nire ezjakintasunean bederen hala da:

  • modemetik telefono harira doan kable-zuloaren ondoan, badago beste zulo berdin bat telefono ikur batekin. Ematen du hor telefono bat konektatu daitekeela... Internetetik berba egiteko adibidez? Hori pentsatzea hankasartzea izango da, baina ez da inori adarra jotzea.
  • soinuarentzako zulo txiki batzuk ere baditu, aurikularrak sartzeko modukoak. Hiru ditu holakoak, eta batek mikro baten ikonoa du.
  • USB zuloak ditu, atzean eta aurrean, baina batek daki zergatik, ez dira berdinak: inprimagailua konektatu daiteke atzeko USB-tik, baina ez Pendrive-a (memoria portatila), hori aurreko USB zulotik bakarrik dabil.

Akaso beste batzuek ere izango dituzte nire zalantzak.

Erantzun (klik zabaltzeko)

Publizitatea