Itzuli orri nagusira Bidali hau

Euskal agenteek garatutako baliabideak utziko dizkio Jaurlaritzak Scansofti

Sustatu - Sustatu ¦ 2003-12-16 ¦ 11:25 ¦ informatika

Eusko Jaurlaritzako Kultura sailak eta Belgikako Scansoft BVBA enpresak hitzarmena sinatu zuten atzo Donostian, euskara aplikazio teknologiko berrietara zabaltzeko. Proiektua garatzeko Eusko Jaurlaritzak euskal agenteek garatutako zenbait hizkuntz baliabide eskuratuko dizkio Scansofti eta gero erabilera publikoa izango dute.

Publizitatea

Hitzarmenaren arabera, euskarazko sintesiaren motorra (euskarazko testua ahots bihurtzeko teknologia) eta ahotsaren ezagutza (ahotsa testu bihurtzeko teknologia) sortuko dituzte. Proiektuak 18 hilabeteko iraupena eta 706.000 euroko aurrekontua du.

Hiru euskal agentek garatuko dituzte baliabideak

  • Testu corpus elektronikoa, ASP enpresak egingo duen 25 milioi hitzeko bilduma.
  • Oinarrizko lexiko fonetikoa. Gehien erabiltzen diren hitz, laburdura eta akronimoen 60.000 sarrera baino gehiagoko hitz, laburdura eta akronimoen bilduma izango da. Hitzek transkripzio fonetikoa eta gramatikala izango dituzte eta Eleka enpresak egingo du.
  • Telefoniako datu base akustikoa ere egingo dute: hainbat grabazio egingo dituzte telefonoa erabiliz. EHUko Aholab taldeak egingo du. Bestalde, EHUko Zientzia eta Teknologia fakultateak beste datu base akustikoa egingo du, bulegoetan egindako grabazioen bitartez.

Joan den azaroaren 21ean eman genuen Sustatun Eusko Jaurlaritzak Scansoft enpresarekin lortutako hitzarmenaren berri.

Erantzunak

#1. Proiektuak izango dituen aplikazioak

Sustatu ¦ 2003-12-18 ¦ 09:49

Euskarazko ahotsaren sintesiaren eta ezagutzaren motorrak geroko aplikazioen oinarrian egongo dira, hala nola, telefono-zentralitak (call centers), merkataritza- eta banku-eragiketak, jendeari erantzuteko zerbitzuak, jostailuak, euskararen irakaskuntza, telefono-direktorioak, garraio publikoa etab. Halaber, proiektuaren barnean Eusko Jaurlaritzarentzako Directory Assistance baten aplikazio erakusgarria egingo da.

Beherapena software hori erostean

Aplikazio horiek garatuko dituzten enpresek %15eko beherapena izango dute Scansoften garapen-softwarea erostean eta ondoren egin ditzaketen hobetze-lanetan. Hizkuntza tresneri honen garapenerako eta erosi dituen eskubideen truke, Kultura sailak 706.000 euro ordainduko ditu.

Erantzun (klik zabaltzeko)

Publizitatea