Interneteko albistegia

XML: modako lengoaia

Gari Araolaza - C&S ¦ 2002-04-09 ¦ 15:22 ¦ informatika

Internet eta informatikan afizio pixka bat baduzu, seguru ikusi duzula batean eta bestean XML hitza. Baina zer da XML hori?

Publizitatea

XML informazioa trukatu eta gordetzeko lengoaia berria da. Ez al zaizu inoiz gertatu, norbaitek e-postaz bidalitako dokumentu edo artxibo bat ezin ireki ibiltzea? Beste gauza askoren artean hau konpontzera dator eXtensible Markup Language edo XML hau. Izan ere, oinarri sinplea izanik, indar ikaragarria du lengoaia berri honek. Adibidez, tortilla frantsesaren errezeta posible bat XML lengoaian:

<errezeta>
  <izenburua> Tortilla frantsesa </izenburua>
  <egilea> Gari Araolaza </egilea>
  <osagaiak>
    <osagaia> Arraultza </osagaia>
    <osagaia> Oliba olioa </osagaia>
  <osagaiak>
  <prozesua>   
    <pausoa> Jarri olioa zartagin batetan berotzen </pausoa>
    <pausoa> Apurtu arraultzak platertxo batetan </pausoa>
    <pausoa> Arraultzak zartaginera bota eta buelta bat eman </pausoa>
    <pausoa> Atera plater azal batetara tortilla </pausoa>
  </prozesua>
</errezeta>

Atentzio pixka batekin irakurriz, formatuaren funtsa ulertuko duzula pentsatzen dut. Etiketa batzuekin markatu dugu testua zeinak <etiketa> moduan hasi eta </etiketa> bezala bukatzen diren. Bien tartean beharrezkoa den informazioa jartzen dugu. Sinplea, ez da? Itxuraz tontakeria dirudien honen abantailak zeintzuk dira? Beste batzuen artean:

Programatxo bat presta daiteke errezeta zerrenda jakin bat egiteko behar diren osagaiak ordenagailu batek atera ditzan. Hau da, datuen prozesamendu automatikoa errazten du.
Errezetak trukatzeko sistema ideala da, formato berdin berdina bait da bai Windows, zein Linux edo Mac sistemetarako.
Ordenagailuez aparte, pertsonek ere erraz ulertzeko moduko formatua da, eta programatzaile batek azkar egin ahal izango du tratamentu automatikorako programa bat, kodea pixka bat aztertu ondoren.
Gainera, etiketak norberak edo adostutako talde baten artean asma ditzakegu. Hau da, jar gaitezen lanean euskal gastronomian interesa dugun talde bat eta prestatu dezagun guretzat bereziki balioko duen XML dialekto bat adibidez

Sistema honen indarra uler dezazuen hona hemen beste zenbait adibide:

Sustatuko albisteak XML formatuan beste webgune batzuetan

Pentsa Argiak Sustatuko albisteen titularrak bere webgunean integratu nahi dituela. Nahikoa dute egunean bi edo hiru aldiz programa baten bidez helbide honetan dagoen informazioa jasotzea. Ikus ezazu zuk zeuk, helbide horretan dagoena zure ordenagailuan gorde eta gero Windows-eko Bloc de notas edo testu editore sinple batekin irekiz. Sustatuko albisteak beste webguneetan integratu daitezke oso erraz, programatxo sinple bat eginez.

Testu prozesagailu guztietan (Word eta horrelakoak) erraz zabalduko diren dokumentuak

Hau martxan da jadanik OpenOffice proiektuaren eskutik.

Sistema guztiz desberdinaz dabiltzan bi ordenagailu ezezagunen arteko elkarrizketa

Euskadiko Kutxako kutxazainera joan naiz nire BBVAko txartelarekin dirua ateratzera eta kutxazain automatikoak nire datuekin honelako eskaera egiten du BBVA banketxera, beraien sarearen bidez:

<galdera>
  <nork> Euskadiko Kutxako ordenagailua </nork>
  <nori> BBVAko ordenagailua </nori>
  <bezeroa> Gari Araolaza </bezeroa>
  <eskaera> Eskudirua ateratzea </eskaera>
  <zenbatekoa> 1000 Euro </zenbatekoa>
</galdera>

Eta BBVAko ordenagailuaren erantzuna:

<erantzuna>
  <nori> Euskadiko Kutxako ordenagailua </nori>
  <nork> BBVAko ordenagailua </nork>
  <bezeroa> Gari Araolaza </bezeroa>
  <emaitza> Ezeztatua saldo faltagatik </emaitza>
</erantzuna>

Oraingo hau nik asmatutako XML-a da, baina baliteke antzerako elkarrizketak gertatzea momentu honetan hainbat eta hainbat ordenagailuren artean. XML dialekto ugari daude, eta egunero sortzen dira berriak, edozein beharretara egokitzeko. Informazio ugari aurkituko duzu sarean: